DILI, 02 setembru 2024 (TATOLI)—Kandidatu admitidu iha vaga bolsa kandidatu ne’ebé fó sai husi Ministériu Edukasaun (ME), daudaun ne’e iha faze trata dokumentu molok kolokiua ba fatin ne’ebé sei hala’o knaar.
“Ami prepara hela no la kleur tan ita koloka ona. Ita la temi ohin ka aban, ha’u la temi loron maibé presiza dukumentu sira atu halo kompleta ba administrasaun nian. Tanba ne’e, rekursu umanu prepara hela ida-ne’e,” Sekretáriu Estadu Ensinu Sekundáriu Tékniku Vokasionál, Domingos Lemos Lopes, informa, hafoin enkontru ho bolseiru, iha Vila-Verde, segunda ne’e.
Kolokasaun ida-ne’e sei fahe fazeadamente no sei hahú husi valór 100 tun mai kraik.
“Iha ne’ebá define bolsa kandidatu, signifika ita foti rangking husi valór 100 tun mai kraik ne’e, maibé ita sei para iha númeru 1.200. Depois ita haree posibilidade, ita sei la koloka dala-ida kandidatu sira-ne’e hotu. Ita koloka fahe fazeadamente no tuir rangking,” nia akresenta.
Notísia relevante : Kandidatu admitidu bolsa kandidatu hein xamada husi ME ba kolokasaun
Diretora Rekursu Umanu iha Ministériu Edukasaun (ME), Anita Tavares, informa, kolokasaun kandidatu admitidu ba konkursu bolsa kandidatu profesór ba faze daruak ne’e hein xamada husi ME.
“Hanesan sosiedade tomak hatene bolsa kandidatu ne’e nu’udar lista ida-neʼebé sei uza hodi taka vaga nu’udar profesór iha eskola públika sira. Tanba ne’e, kandidatu bolsa hotu la garante sei tama kedas hanesan dosente karreira, maibé tenke hein xamada husi Ministériu Edukasaun. Kandidatu admitidu tenke hein xamada bazeia ba seriesaun ne’ebé determina atu halo seriesaun ne’e haree ba kritéria mak notas teste eskrita, seksu no data moris,” Diretora Anita Tavares, tenik.
ME tenke uza orden iha bolsa kandidatu ne’e hodi halo xamada atu labele haksoit liu kandidatu ida ba seluk. Depois públika lista provizóriu ME hetan reklamasaun balun neʼebé lori impaktu ba lista tuir ninia seriesaun.
Tanba ne’e, ministériu husu ba kandidatu sira atu haree didi’ak sira-nia dadus ne’ebé públika iha bolsa liu-liu loron moris nomós seksu hodi garante katak laiha fallansu.
“Iha maiu 2024 durante konkursu ba dahuluk Komisaun Funsaun Públika (KFP) aprova ona vaga 953 no iha maiu kompleta ona vaga 448 no sei restu 505. Hanesan ne’e sira ne’ebé ranking 1 to’o 505 sei hetan xamada iha semana ne’e nia laran, sira seluk espera katak sei hetan xamada iha setembru depois formaliza vaga tan. Ministériu Edukasaun sei espera formaliza vaga 1.200 tan iha fulan-gostu,” nia informa.
Nia esplika, kandidatu admitidu antes ne’e 2.442 maibé ida esklui tanba idade kuaze 58. ME elemina tanba regra ne’ebé iha konkursu ne’e kandidatu sira nia idade labele liu 52 ba leten.
Jornalista : Osória Marques
Editora : Julia Chatarina
