DILI, 04 setembru 2024 (TATOLI) – Prezidente Repúblika, José Ramos Horta, kondena maka’as atuasaun ne’ebé Sekretáriu Estadu Asuntu Toponímia no Organizasaun Urbana (SEATOU) ho ekipa halo ba negósiante ambulante iha Kampung Baru-Comoro Dili,tersa kalan (03/09) tanba la profisionál, laiha etika no hafoer Governu, inklui hamonu nasaun nia naran.
PR Horta hato’o asuntu ne’e relasiona ho atuasaun SEATOU nian ba negósiante ambulante liuliu baku rahun hotu negósiante sira nia produtu hanesan modo-tahan, tomate no seluk tan, inklui halo kanek mós negósiante balun.
Ho atuasaun ne’e, Xefe Estadu dehan sei ko’alia ho primeiru Ministru, Xanana Gusmão, atu haree ka avalia nia Sekretáriu Estadu ne’e.
“Ha’u seidauk ko’alia didi’ak ho Primeiru-Ministru atu haree nia Sekretáriu Estadu oan ida-ne’e, nia atuasaun ne’e halo fo’er Governu hotu nia naran ho hafoer nasaun nia naran, nune’e husu Sekretáriu Estadu ne’e tenke responsabiliza”, Xefe Estadu hateten ba Jornalista sira.
Prezidente Repúblika dehan povu prontu kolabora ho Governu, se hakarak sira hamamuk fatin ne’e tempórariu tenke ko’alia di’ak ho sira hodi hasai osan kompensasaun ba sira loron haat ka lima sira ba deskansa, Amu-Papa liu mak kontinua fali, nusa la uza meiu sira ne’e tenke halo nune’e.
Ho situasaun ne’e, PR Horta dehan iha ona planu atu Palasiu Presidensiál atu buka tuir negosiante ambulante sira ne’ebé nia sasan hetan estragu tanba aktu husi SEATOU ho nia ekipa hodi fó kompesasaun.
“Ha’u iha Palásiu Prezidensiál hanoin ona utiliza osan Prezidente nian halo lista ida, atu buka tuir ema sira lakon sira nia sasan durante SEATOU sobu iha Comoro ne’e, Prezidente sei utiliza osan rasik hodi fó kompensasaun ba sira,” PR Horta kompromete.
Notísia relevante:PAM Dili la konkorda SEATOU halo atuasaun agresivu hasoru vendedór sira
Jornalista: Hortencio Sanchez
Editór: Florencio Miranda Ximene
