JAKARTA, 06 setembru 2024 (TATOLI) – Iha Indonézia, Papa Francisco, ho ninia umilde no hakraik aan husik hela mensajen simplesidade ba fiar-na’in rihun ba rihun.
Simplesidade impresionante ne’e Papa hatudu iha Indonézia bainhira nia rei Grande Imã nia liman hafoin diálogu inter-relijioza iha Mesquita Istiqlal, Jakarta, kinta ne’e.
Bainhira Grande Imã despedida Papa Francisco ho kaer-liman no hakuak, enkuantu Santu Padre rei Grande Imã nia liman ho hamnasa.
Atu umilde ne’e sai viral iha media sosiál no sai lisaun importante ba líder hotu iha mundu atu halo tuir. Simplesidade ne’e husik hela ba mundu katak simu malu mak xave ba konvivénsia, armonia no pás.
Papa nia jestu dramatiku ne’e la’ós primeira vez mak nia halo, maibé nia halo beibeik ona hodi hatudu respeita no umildade ba ema seluk.
Fó hanoin hikas katak katak, iha 2014, iha Sidade Jerusalem, Papa Francisco rei vítima na’in neen nia liman hodi hatudu respeita ba sira bainhira sira sofre atake terrorista.
Nune’e mós iha 2019, Santu Padre rei Líder Sudão do Sul nia ain hodi husu lider tomak iha Sudão do Sul atu evita funu sívil no harii pás.
Iha Indonézia, Papa Francisco mos hatudu ninia umilde liuhusi lolo-liman no kumprimenta ema hotu tuir dalan ho hamnasa ho sentidu ida katak sai líder persiza hakuak ema hotu la haree ba kór, riku no ki’ak ka metan no mutin.
Reasaun ba aktu simplesidade ne’e, sarani Katóliku Indonézia barak hasai matan-been haksolok nian bainhira harea Kareta Mutin tula Papa Francisco hakbesik ba sira.
Papa Fracisco, iha ninia enkontru sira hatudu mós nia umilde ba labarik kiik sira liuhusi kaer-liman no hakuak.
Jornalista: Filomeno Martins
Editór: Rafael Ximenes de A. Belo
