DILI, 10 setembru 2024 (TATOLI – Sua santidade Papa Francisco konsidera Kaebauk no Belak nu’udar patrimóniu importante ne’ebé simboliza timoroan sira-nia identidade.
“Kaebauk no Belak buat rua ne’e hotu halo hosi osan folin boot signifika katak ne’e sasán importante,” Santu Padre hateten bainhira dirije misa solene iha Tasi-Tolu, Dili, tersa ne’e.
Xefe Estadu Vatikanu ne’e hatutan, Kaebauk simboliza karau-dikur no loromatan nia roman, no ida ne’e tau iha aas hafutar iha rento’os nune’e m’os iha uma-kakuluk tutun la’o-tuir forma uma- kakuluk nian.
Kaebauk mós hatudu kbiit enerjía no manas no bele reprezenta kbiit Nai Maromak nia neʼebé fó moris.
“Maibé la’os ida-ne’e de’it, tanba ema koloka nia iha ulun no uma kakuluk tutun, ida-ne’e fó hanoin mai ita katak ho roman Nai Maromak nia liafuan no ho forsa husi ita-nia grasa ita mós bele serbisu hamutuk iha planu salvasaun nia liuhusi ita-nia eskolla sira no asaun sira,” Papa Francisco hateten.
Líder Katólika Mundiál ne’e subliña, belak neʼebé ema tau iha hirus matan kompleta ho kaebauk fó hanoin mai ita kona-bá fulan nia nabilan, rai-kalan neʼebé hó haraik-aan refleta loromatan nia roman mihis mamar.
Futar ne’e signifika pás, fertilidade no laran maus, no simboliza inan ida nia ternura, inan ida-ne’ebé ho nia domin delikadu tebes halo nabilan buat hotu, neʼebé nia kaer ho roman neʼebé nia simu husi Nai Maromak.
Ikus liu Amu Papa dehan, kaebauk no belak hanesan forsa husi aman no inan nune’e mak Nai Maromak batudu nia realeza ne’ebé halo ho karidade no mizerekordia.
“Tanba ne’e iha eukarístia ida-ne’e hamutuk ita idak-idak nu’udar mane no feto, nu’udar igreja no sosidedade, husu grasa sabedoria atubele refeleta iha mundu roman ne’ebé forte no terna husi Maromak domin nia, husi maromak ida-neʼebé hanesan ita hananu iha Salmo responsariál, ohin nia foti ema kbiit laek husi rai-rahun laran no hasai ema kiak husi kiak atu halo sira bele tuur iha ema-boot sira leet iha nia povu,” Santo Padre fó hanoin.
Kaebauk signifika enfeite osan-mutin ho forma fulan-balun nian ne’ebé timoroan sira tau iha reen-to’os hodi bá bidu. Belak katak buat metál hanesan medalla boot ida, ne’ebé tuir lisan Timór nian, feto fó ba mane hodi fó-hanoin kona-ba sira-nia domin. Iha belak osan-mean no belak osan-mutin.
Notísia relevante: Falta oras haat, Sarani sira nakonu ona iha Tasi-Tolu
Jornalista: Sérgio da Cruz
Editór: Evaristo Soares Martins
