DILI, 10 setembru 2024 (TATOLI) – Maske misa solene falta oras haat maibé oras ne’e sarani sira nakonu ona iha fatin konsentrasaun misa solene Tasi Tolu, Dili.
“Dili nia fatin nakonu ona no parte Tasi-Tibun mós nakonu hotu, agora ami reza Ángelos tanba meodia ne’e tenke reza,” Peregrina husi Munisípiu Dili, Norberta Gomes, informa ba TATOLI, Segunda ne’e.
Nia dehan, sarani Dili mak barak liu entaun fahe balun ba hamutuk ho munisípiu sira seluk.
“Ne’ebé agora ami ba hamutuk fali ho munisípiu Baucau nian,” nia haktuir.
Sarani husi Liquiçá, Pasquela dos Santos informa TATOLI liuhusi faceebook hateten, fatin konsentrasaun iha partem isa solene nian nakonu ona.
“Agora iha parte laran, ha’u book-aan ladi’ak, ha’u tenta sai ba liu’ur dezde ohin, maibé la konsege, ne’ebé agora ha’u tenta sai uma adat ne’e. maske loron-manas maibé ha’u tenke esforsu atu tuir misa ne’e,” nia espresa.
Remília do Santos Correia, nu’udar sarani husi munisípiu Liquiçá, manifesta nia sentimentu kontente hi prezensa Sua Santidade Papa Fransisco mai Timor-Leste hametin liután ninia fiár katóliku nia, tanba Santu Padre líder Katóliku mundiál ida ne’ebé simplisidade, hakraik-an no la halo diskriminasaun ba ema hotu.
Peregrina husi Hu Iso Lara Iso ne’e deside ho sentimentu no vontade tomak partisipa iha misa apostóliku ne’e, tanba hakarak hetan bensaun husi Santu Padre.
Notísia relevante: Sarani Bobonaro no Liquiçá nadadon tama ba Tasi-Tolu
“Ha’u sente kontente no orgulu tanba hanesan jerasaun foun foin primeira vez hetan Amu Papa Francisco no Amu Papa rasik mós foin primeira vez mai Timor-Leste, amu Papa ema ida di’ak, simples tebes, ninia jestu ida-ne’e mak bele hametin liután ami-nia fiar, no ida-ne’e ita sarani hotu-hotu presiza banati tuir,” peregrina ne’e informa ba Jornalista TATOLI iha Tasi-Tolu, Dili, tersa ne’e.
Sentimentu hanesan ne’e mai mós husi perigrina munisípiu Liquiçá, Ángela dos Santo, tanba selebrasaun misa apostóliku hanesan momentu oportunu ida-ne’ebé la naran akontese iha tinan ida ka rua nia laran.
“Ami hein kleur tebes atu simu Santu Padre, ida-ne’e hanesan grasa boot, liuhusi misa ida-ne’e ami bele simu bensa no domin husi Papa rasik,” nia katak.
Tuir refortajen ne’ebé jornalista Agência TATOLI, Sérgio da Cruz informa katak fatin bam isa solene ne’e nakonu ona maibé iha dalan husi parte Fatuhada, Comoro to’o Tasi-Tolu, sarani sira kontinua hein nafatin Papa Francisco.
Maske falta oras haat, maibé sarani sira kontinua hein iha dalan-ninin hodi manifesta kontente simu Papa atu prezide misa solene iha Tasi-Tolu, tuku 16:00.
Observasaun seluk ne’ebé TATOLI nota iha terrenu nota katak, besi barikade ne’ebé monta iha odamatan atu tam aba laran sarani sira sobu hodi hola-fatin iha laran.
Jornalista: Sérgio da Cruz
Editór: Evaristo Soares Martins
