DILI, 18 setembru 2024 (TATOLI)–Jerente empreza Robena Unipesoál, Lda. Joel Sousa Cabral, hateten empreza Robena kuda ona ai-funan pucuk merah ((Syzygium myrtifolium) hamutuk 825 iha estrada protokolu husi Tasi-Tolu to’o iha Palásiu Prezidensiál Nicolau Lobato, Bairru Pite nia oin.
Nia hateten ai-funan ne’ebé empreza kuda ne’e hahú iha fulan rua liuba no ai-funan sira-ne’ebé kuda ne’e husi dalan protokolu iha Palásiu Prezidensiál Nicolau Lobatu nian ne’e kuda substitui de’it ai-sira ne’ebé kuda anteriormente maibé mate hotu ona ne’e, no kuda ho distansia metru lima ba kada ai-funan pucuk merah sira hodi bele moris ho di’ak.
“Ami kuda hotu ona ai-funan oan sira-ne’e. Tipu ai-funan ne’ebé ami kuda ne’e mak ai-funan pucuk merah, ida-ne’e ami kuda hamutuk 825,” Jerente empreza Robena Unipesoál, Lda, Joel Cabral, hateten ba Agência Tatoli, kuarta ne’e.
Jerente ne’e hateten, ai-funan pucuk merah sira-ne’e foti iha sentru viveiru iha suku Leorema, postu administrativu Bazartete, munisípiu Liquiça no balun iha fatin seluk mak hodi kuda iha estrada protokolu.
Joel Sousa Cabral hateten, ai sira-ne’e agora moris ho di’ak maibé balun iha difikuldade atu moris, tanba mudansa lori husi fatin ida ba fatin seluk fali.
Nia hateten, empreza kuda hotu ona ai-funan sira-ne’e maibé sei kontinua halo manutensaun ba iha ai-funan sira-ne’ebé kuda ona iha dalan protokolu.
“Ami iha fulan tolu atu halo manutensaun, tanba ne’e ami kontinua tau matan to’o fulan-outubru ramata,” nia dehan.
Jornalista : Jesuína Xavier
Editór : Cancio Ximenes
