DILI, 20 setembru 2024 (TATOLI) – Diretora Ezekutiva Forum Komunikasaun Feto Timor Lorosa’e (FOKUPERS), Domingas Amaral, mensiona FOKUPERS rejista desde janeiru, vítima violénsia fízika hamutuk 240.
“Husi janeiru to’o setembru, ita rejista ona kazu violénsia fízika ho totál 240”, Domingas Amaral informa ba jornalista sira bainhira partisipa semináriu kona-ba hametin setór saúde nia partisipasaun iha sistema rede referrál jestaun kazu no mós fornesimentu servisu kuidadu saúde ba sobrevivente sira iha uma mahon iha Hotel Novo Turismo, ohin.
Nia dehan, FOKUPES nia misaun mak atu kontinua mellora ninia asisténsia ba sobrevivente violénsia bazeia ba jéneru no nafatin halo prestasaun servisu ne’ebé kualidade.
“Ha’u hanoin ida-ne’e mak misaun boot FOKUPERS nian atu kontinua mellora ninia asisténsia sobrevivente ba violénsia bazeia ba jéneru, entaun nafatin halo prestasaun servisu ne’ebé kualidade no nafatin asegura konfidensialidade vítima nian bainhira sira mai relata”, nia informa.
Nia esplika, servisu ne’ebé mak FOKUPERS fornese ba vítima violénsia bazeia ba jéneru mak integradu no hatan ba sira-nia nesesidade, entaun hanesan baibain katak bainhra sira mai to’o ona FOKUPERS, sira relata sira-nia kazu ho sentiment, hakarak hetan apoiu ka asisténsia ruma.
Nia haktuir, FOKUPERS halo koordenasaun di’ak ho sentru saúde Comoro, Formoza no Vera Kruz, atu sira bele hetan mós atendimentu husi médiku sira.
“Ita halo kolaborasaun ne’ebé mak di’ak ho sentru saúde sira hanesan Formoza, Vera Kruz no Comoro, entaun ida-ne’e di’ak maibé presiza mellora di’ak liután, kualidade atendimentu, fasilidade no rekursu sira, maibé ita mós presiza asegura konfidensialidade vítima nian, bainhira sira ba relata sira-nia kazu no ita mós presiza investe médiku sira ba treinamentu sira kona-ba oinsá halo atendimentu ba vítima sira”, nia hateten.
Violénsia bazeia ba jéneru ida-ne’e maioria FOKUPERS rejista husi Munisípiu Liquiça no Ermera.
Jornalista : Felicidade Ximenes
Editór : Zezito Silva
