OÉ-CUSSE, 25 Setembru 2024 (TATOLI) – Diretór Nasionál Terra no Propriedade (DNTP) Rejiaun Administrativa Espesiál Oé-Cusse Ambeno (RAEOA), Júlio Coel, informa indemnizasaun ba komunidade afetada ba projetu Zona Espesiál Ekonomia Sosiál Merkadu Timor-Leste (ZEESM) hein publikasaun iha Jornál Repúblika.
“Autoridade RAEOA deside ona atu altera deliberasaun uluk [selu rai metru2 ho] $3 ba $5. Deliberasaun ne’e aprova ona, maibé agora ami hein de’it publikasaun iha Jornál Repúblika”, Júlio Coel dehan ba jornalista sira, ohin.
Notísia relevante: Autoridade RAEOA indemniza rai afetadu ba projetu ho kada metru² $5
Nia lembra katak pagamentu ba populasaun ne’ebé nia rai afetadu ba projetu ne’e, iha autoridade anteriór nia tempu halo ona ba suku rua mak Nípani no Lalisuk. Daudaun ne’e, autoridade foun esforsu atu halo indemnizasaun, tanba hakarak halo pagamentu ida justu ba komunidade ne’ebé nia rai afetadu ba projetu dezde 2015. Autoridade atuál identifika ona populasaun iha suku Costa no Cunha atu halo pagamentu.
“Agora, ami hein de’it públikasaun iha Jornál Repúblika, nune’e bele prosesa ona pagamentu, tanba tinan ne’e autoridade prevee kedan nia orsamentu hamutuk millaun $1,1. Ita-nia pedidu mós tama ona iha Prezidente Autoridade no hein de’it aprovasaun atu halo pagamentu ba plantasaun, hahú uluk iha sub-rejiaun Pássabe, Oésilo no Pante Makasar, liuliu ba alargamentu estrada”, nia adianta.
Notísia relevante: Autoridade RAEOA hahú rekolla dadus hafoin halo pagamentu ba komunidade afetadu projetu ZEESM
Tuir dadus, iha populasaun besik rihun ida husi suku Costa no Cunha no suku sira seluk mak afetada ba alargamentu estrada husi ponte Noefefan to’o Oénunu Suni-Ufe, nomós husi Tono bá Oésilo. “Daudaun halo rekolla hela dadus no balun foti ona, maibé sei rezolve uluk dadus pendente sira mak foin kontinua ba dadus foun”, dehan.
Dirijente ne’e rekoñese katak populasaun balun hato’o lamentasaun liuhusi karta no seluk liuhusi mídia sosiál, maibé prosesu hotu to’o ona faze finál, nune’e hein de’it publikasaun foun iha Jornál Republika hodi indemniza sira.
Notísia relevante: Komunidade afetadu Samoro espera Autoridade RAEOA rezolve rezidénsi Fulolo
Tuir dadus husi ekipa téknika Terra no Propriedade, abitante hamutuk 372, komposta husi suku Cunha 111 no Costa 261 mak nia rai afetadu ba projetu.
Rekorde katak, iha marsu 2023, antigu autoridade RAEOA lideradu husi Arsénio Paixão Bano aprova ona deliberasaun ida ho númeru 2/2023, loron 24 fulan-Fevereiru hodi selu rai kada metru2 ho $3.
Jornalista: Abílio Elo Nini
Editora: Maria Auxiliadora
