DILI, 27 setembru 2024 (TATOLI)—Pro-Reitór ba Asuntu Dezenvolvimentu Instituisionál iha Universidade Nasionál Timor-Lorosa’e (UNTL), Lelis Gonzaga Fraga, konsidera presiza iha jestaun no tempu di’ak ba utilizasaun saladeaula.
Lelis Gonzaga Fraga hato’o asuntu ne’e hodi hatan ba kestaun ne’ebé levanta husi Asosiasaun Akadémika Estudantil Universidade Nasional Timor-Lorosa’e (AAE-UNTL) kona-ba problema tolu hanesan infraestutura, jestaun finanseiru no estrutura universidade.
“Atu harii edifísiu foun ne’e presiza tempu naruk, tanba ne’e mak tenke pasiénsia, importante mak ita iha planu serbisu no fornese ekipamentu atubele rezolve oituan-oituan. Saladeaula naton hela para sira bele utiliza, importante mak ema hotu tenke iha kontribuisaun, jestaun ba tempu di’ak, no oráriu sira ne’e klaru. Sala sufisiente ita tenke haree kondisaun mak mínimu ita tenke halo, tenke utiliza sala ne’e ho másimu, labele uza sala ida, maibé sala ida ita la uza, entaun ida ne’e ladún di’ak,” Pro-Reitór hateten iha ninia knaar fatin, UNTL sentrál, sesta ne’e.
Notísia relevante : AAE-UNTL kestiona problema tolu ne’ebé estudante enfrenta
Nia dehan, UNTL nafatin utiliza osan ho di’ak tanba ne’e mak kada tinan ne’e sempre harii edifísiu foun, desde tinan 2021 to’o agora.
“Signifika katak Governu nafatin suporta orsamentu ba ita para ita konstrui edifísiu foun kada tinan, nune’e estudante sira bele uza ba prosesu aprendizajen no la signifika katak UNTL la halo konstrusaun foun maibé ita halo fazeadamente,” nia akresenta.
Iha sorin seluk, Dekanu fakuldade Ekonomia no Jestaun, Filipe Mendes, haktuir, uluk ne’e iha saladeaula neen maibé ho jestaun di’ak maka la prejudika ba estudante sira-nia atividade.
“Neste momentu ami-nia aula ne’e hahú husi tuku 08:00 dadeer to’o 07:00 kalan atu oinsá mak halo jestaun ba saladeaula atu hotu-hotu hetan saladeaula. Fakuldade Ekonomia no Jestaun daudaun ne’e laiha problema ba salafeaula tanba aumenta ona ba sala 18, ne’e sufisiente ona,” nia tenik.
Nune’e mós, projetór no komputadór maski la sufisiente maibé fakuldade nafatin jere ho di’ak, nune’e estudante hotu bele utiliza ho di’ak.
“Kona-ba projetór, sim laiha, komputadór mós la sufisiente mais iha fakuldade agora iha ona fasilidade projetór no komputadór inklui dosente sira balun uza laptop, entaun sira ne’e fasilita ona dosente sira, se mak aula iha bele foti ba uza, laiha mós ami halo jestaun ba projetór ne’e la’o di’ak hela no kada departamentu iha projetór para sira bele uza ,” Dekanu katak.
Aleinde ne’e, planu asaun anuál ba tinan 2025 mak formasaun profesór sira iha área peskiza no área metodolojia inklui halo planu mós ba estabelesimentu laboratóriu ba fakuldade no departamentu Kontabilidade Jestaun, atu nune’e estudante sira bele asesu fasilidade sira hodi aumenta kapasidade.
Jornalista : Osória Marques
Editora : Julia Chatarina
