BOBONARO, 27 setembru 2024 (TATOLI)-Sekretáriu Estádu Kooperativa (SEkoop), Arsenio Perreira da Silva, hamutuk ho membru Parlamentu Nasionál Komisaun D ho B no Autoridade Munisipál Konsellu Veteranu Munisípiu, membru MOKATIL munisípiu Bobonaro, sesta ne’e lansa atividade kuda Batar Foos (Bafo) Kayrala ektar rua iha aldeia Halekou, suku Ritabou, postu administrativu Maliana.
SEKoop, Arsenio Perreira da Silva, hateten katak atividade ne’e nu’udar kontinuasaun programa IX governu nia ne’ebé hala’o iha postu administrativu Maliana hanesan aldeia Sekar, suku Holsa no fatin seluktán.
Notísia relevante:SEkoop lansa produsaun promosaun Bafo-Kayrala iha Pante Makasar
“Ohin ita mai iha ne’e halo lansamentu kuda, dalaruma ema sira haree katak tanba saida mak bai-loron ne’e ita bele kuda Bafo-Kayrala ne’e, ha’u hanoin nia bele moris iha ne’ebé de’it ho kondisaun rai ne’ebé de’it, iklima ne’ebé de’it, soké iha diferente ne’e iha ninia produsaun,” SEKoop, Arsenio Perreira, ba jornalista sira hafoin iha terrenu hafoin halo lansamentu.
Governante ne’e hatutan, Primeiru-ministru, Kayrala Xanana Gusmão, orienta ona SEkoop kontinua halo promosaun no dezenbolve Bafo-Kayrala iha territóriu laran tomak tanba produtu ne’e nu’udar ai-han ne’ebé saudavél no nutritivu ne’ebé riku ho karbohidratu, proteina no vitamina.
Governu mós iha planu kuda Bafo-Kayrala sei integra mós ho atividade sira seluk hanesan haki’ak animál, kuda ai-fuan sira seluk tan.
Ezekutivu ne’e fundamenta, tuir dadus ne’ebé iha SEKooP kolleta ona Bafo-Kayrala iha territóriu nasionál hamutuk tonelada 84.
“Governu ida-ne’e ninia polítika katak ita prodús, depois ita fornese ba Merenda Eskolar, tanba tama ona iha lista menu-Merenda Eskolar nia, tanba Bafo-Kayrala ne’e ai-han ne’ebé bele fó nutrisaun di’ak, nune’e ita-nia oan sira konsumu ida ne’e para sira iha nutrisaun di’ak, nune’e kuandu aprende iha ensinu bele matenek,” nia tenik.
Prezidente Komisaun B iha Parlamentu Nasionál, Deputadu Domingos Agusto ‘Deker’, apresia no konsidera programa governu nia ne’e bele ajuda dezenvolve ekonomia rai-laran hodi konkretiza prinsípiu no mehi éroi sira-nia katak liberta povu husi ki’ak no mukit.
“Ita iha mehi atu sai nasaun, sai hanesan povu ida iha Liberdade, independénsia, atu kaer rasik ninia kuda-talin, iha prosesu lubuk boot, ita kaer-metin prinisípiu rua, nu’udar mehi ne’ebé povu no éroi sira defende iha funu naruk nia laran. ohin ita alkansa ona luta ba libertasaun pátria, maibé liu ona tinan-20 resin prosesu libertasaun povu ne’e mak sai preukupasaun bo’ot,” Deker hateten.
Iha sorin seluk, Xefe suku Ritabou, Maximiano dos Santos Araújo, agradese SEKoop ne’ebé hili ona aldeia Halekou ba lansamentu kuda Bafo-Kayrala.
“Ida-ne’e foin primeira-vez sira kuda iha ne’e, maibé tinan uluk liubá sira kuda iha Mau-Mali ne’e la konsege hetan rezultadu tanba animál sira husik arbiru de’it, estraga hotu. Agora tinan ne’e, ita koko fali iha aldeia Helekou, espera katak ita sei organiza hakiak-na’in sira bele kuidadu animál para ita bele loke tan ba rai sira ne’ebé mak merese atu kuda Bafo-Kayrala,” Maximiano hakotu.
Enkuantu molok lansa kuda Bafo-Kayrala, SEKooP serbisu hamutuk ho Ministériu Agrikultura, Pekuária, Peskas no Floresta, halo mós lansamentu fila-rai ektar 47 ne’ebé tuir planu sei kuda Bafo-Kayrala iha fulan-novembru 2024.
Notísia relevante:EBC Salele sai pilotu ba utiliza Bafo Kay Rala iha PME
Jornalista: Sergio da Cruz
Editór : Rafael Ximenes de A. Belo
