DILI, 30 setembru 2024 (TATOLI) – Ministériu Transporte no Komunikasaun (MTK) prosesa hela sertifikasaun ba Aeroportu Doméstiku Rute do Sândalo ho objetivu atu loke rute voo internasionál iha Oe-Cusse.
Ministru Transporte no Komunikasaun, Miguel Marques Manetelu, hateten katak atu bele realiza sertifikasaun aeroportu nian mak MTK husu ona asisténsia téknika hosi Ministériu Transporte Indonézia nian hodi dezeña alvu voo internasionál sira iha Oe-cusse durante vizita ba Indonézia iha meadu setembru 2024.
“Iha enkontru, ami ko’alia kona-ba sertifikasaun Aeroportu Oe-cusse, ida-ne’e ho objetivu atu aviaun internasionál sira bele tun iha Oe-cusse. Buat ne’ebé ha’u diskute ho Ministru Transporte Indónézia Budi Karya Sumadi maka atu husu asisténsia téknika hodi halo dezeñu ba rute Espasu Aéro, tanba Oe-cusse nu’udar área enklave hale’u Indonézia, ba ida-ne’e ami husu ajuda atu hala’o dezeñu no prosedimentu ne’ebé apropriadu relasiona ho Espasu Aéro”, Manetelu, informa ba TATOLI iha Aeroportu Internasionál Nicolau Lobato, ohin.
Nia informa, iha fulan-Agostu liu ba, ekipa téknika husi Ministériu Transporte hamutuk ho Autoridade Aviasaun Sivíl Timor-Leste (AACTL) no Administrasaun Navegasaun Aérea Timor-Leste (ANATL) halo ona vizita ba Aeroportu Oé-Cusse Rota do Sândalo hodi halo monitorizasaun direta .
Tuir nia, Aeroportu Oé-Cusse Rota do Sandalo priénse ona padraun ba aeroportu internasionál sira tuir padraun Organizasaun Internasionál Aviasaun Sivíl ( ICAO) nian, nune’e hafoin dezeña trajetu voo nian, sei bele hakat ba etapa tuir mai hodi hetan sertifikasaun ofisiál.
“Ita tenke priénse ezijénsia ICAO nian no to’o agora ita priénse ona, no ita presiza apoiu tékniku husi sira-nia Ministériu Transporte Indonézia nian, tanba iha fulan-Agostu liubá sira marka prezensa iha Oe-cusse hodi halo dezeñu ba ida-ne’e, daudaun ne’e sira sei prepara hela buat hotu”, nia afirma.
Sertifikasaun Aeroportu Internasionál husi ICAO hanesan prosesu ida ne’ebé garante katak aeroportu sira kumpre padraun seguransa no efisiénsia ne’ebé organizasaun ne’e estabelese. Prosesu ida-ne’e importante atu asegura katak aeroportu sira bele funsiona ho seguru no efetivu iha rede aviasaun globál nia laran.
Antes ne’e, Ministru Transporte Indonézia, Budi Karya Sumadi, hateten Timor-Leste nia pedidu atu loke rute foun ba Oecusse, ida-ne’e sei hasa’e konektividade komunidade no fluxu komérsiu.
Tuir pájina Ministériu Transporte Indonézia nian katak oras ne’e daudaun Indonézia mós konstrui hela Terminál Merkadoria Internasionál ida iha Wini, NTT, ne’ebé sei fasilita aumentu movimentu komérsiu nian.
Ajénsia Estadu rua ne’e mós konkorda ona atu estende Nota Entendimentu (MoU) kona-ba kooperasaun ba formasaun rekursu umanu (RH) iha setór transporte.
Jornalista : Felicidade Ximenes
Editór : Zezito Silva
