DILI, 01 outubru 2024 (TATOLI)—Obra konstrusaun eskola foun sia iha munisípiu Ainaro finaliza ona, nune’e iha fulan-outubru nia laran sei entrega ba na’in obra hodi utiliza ona.
“Husi eskola sia ne’e, lima mak ita planu entrega iha 08 outubru tinan ne’e. Eskola sira mak hanesan Ensinu Pre-eskolár, Ensinu Báziku Filiál (EBF) Montanhas, Pre-eskolár Casa, EBF 1,2,3 Luru no EBF 1,2 Pader,” Diretór Servisu Edukasaun Munisípiu Ainaro, Patrício da Costa Magno, informa ba Agência Tatoli, via telefónika, tersa ne’e.
Konstrusaun eskola ne’e hahú iha janeiru 2024 ho kustu obra konstrusaun depende ba kondisaun hanesan sala tolu ninia kustu $80.000, enkuantu sala tolu inklui ho haris fatin ho kustu $100.000-resin.
Notísia relevante : Konstrusaun eskola foun sia iha Ainaro finaliza ona
Diretór Nasionál Infraestrutura Bázika iha Ministériu Edukasaun (ME), Hélio Lopes, hateten, Ministériu Edukasaun (ME) prevee millaun $3 ba konstrusaun no reabilitasaun eskola iha territórriu hamutuk projetu 20.
“Alokasaun ida-ne’e la’ós ona ba projetu komunitáriu maibé liuhusi prosesu aprovizionamentu ne’ebé sei jere husi kontratór ka empreza sira-neʼebé tuir konkursu públiku. Daudaun ne’e, iha hela faze verifikasaun dokumentu tékniku nune’e fulan-marsu bele ona iha konkursu públiku ba projetu foun 20. Projetu ne’e, ita sei realiza iha tinan ida-ne’e,” nia akresenta.
Konstrusaun ne’e atinje ona 75%, balun hotu ona hein entrega de’it ona. Eskola tolu mak foin 75%, restu ne’e hotu ona hein entrega de’it, ida foin to’o 75% mak hanesan Eskola EBF Pader, Eskola ida Maubisse Vila no EBF Maulefo, enkuantu seluk ne’e hotu ona.
Jornalista : Osória Marques
Editora : Julia Chatarina
