DILI, 16 agostu 2024 (TATOLI)—Konstrusaun ba estabelesimentu ensinu foun sia iha munisípiu Ainaro konklui ona no hein Ajénsia Dezenvolvimentu Nasionál (ADN) observa no entrega nune’e bele funsiona.
“Konstrusaun eskola foun iha Ainaro finaliza ona, hein ADN observa no entrega hodi estudante sira uza ba prosesu ensinu aprendizajen,” Diretór Servisu Edukasaun Munisípiu Ainaro, Patrício da Costa Magno, informa ba Agência Tatoli, iha salaun Ministériu Edukasaun (ME), Vila-Verde, sesta ne’e.
Konstrusaun ne’e atinje ona 75%, balun hotu ona hein entrega de’it ona. Eskola tolu mak foin 75%, restu ne’e hotu ona hein entrega de’it, ida seidauk foin to’o 75% mak hanesan Eskola Ensinu Báziku Filiál (EBF) Pader, Eskola ida Maubisse Vila no EBF Maulefo, enkuantu seluk ne’e hotu ona.
Notísia relevante : Projetu konstrusaun eskola 9 iha Ainaro atinje ona 85%
Projetu konstrusaun eskola foun sia neʼebé konstrui ne’e mak hanesan pre-eskolár rua no restante ne’e eskola ensinu báziku hamutuk hitu.
Konstrusaun ba eskola sia mak hanesan Pre-Eskolár Maubisse Vila, Pre-Eskolár Carreta Fatin, Eskola Ensinu Bázika Sentrál (EBC, sigla portugés) 04 Montanha, EBC 05 de Setembro Kasa, Eskola EBF Luro, EBF Pader, EBF Maulefo, Pre-Eskolár Mane Lobat, no EBF Ahimata.
Konstrusaun hahú iha janeiru 2024, ne’ebé ninia kustu ba obra iha kada eskola depende ba kondisaun, sala tolu nia kustu $80.000, enkuantu inklui ho haris fatin ho kustu $100.000-resin.
Jornalista : Osória Marques
Editora : Julia Chatarina
