OÉ-CUSSE, 02 Outubru 2024 (TATOLI) – Sekretaria Rejionál ba Asuntu Terra no Propriedade, Autoridade Rejiaun Administrativa Espesiál Oé-Cusse Ambeno (RAEOA) hahú ona pagamentu ba família 13 ne’ebé nia plantasaun afeta ba projetu integradu iha sub-rejiaun Oésilo.
Sekretáriu Rejionál ba Asuntu Terra no Propriedade, Marcelino Marques Corro, hateten indemnizasaun ne’e bazeia ba deliberasaun autoridade númeru 2/2017, loron 31 fulan-Marsu, kona-ba valór kompensasaun ba plantasaun frutífera ne’ebé afeta ba projetu alargamentu estrada iha RAEOA.
“Pagamentu ne’ebé ita halo daudaun ba ai-oan ne’ebé afetadu. Uluk, autoridade anteriór halo postu integradu iha Oésilo estraga ai-oan balun, maibé seidauk ganti rugi, tanba ne’e mak ita halo pagamentu ne’e ba sira uma-kain 13 ho totál orsamentu rihun $18-resin”, nia informa iha Oésilo.
Notísia relevante: Autoridade RAEOA indemniza rai afetadu ba projetu ho kada metru² $5
Sekretáriu ne’e esplika katak totál orsamentu atu indemniza plantasaun hamutuk rihun $37, maibé fahe ba sub-rejiaun Oésilo rihun $18-resin no Pássabe rihun $18-resin.
Tanba ne’e, valór selu ba ai-oan sira prevista ona iha deliberasaun autoridade númeru 2/2017, loron 31 fulan-Marsu hodi selu ba ai sira mak hanesan marungi, ai-teka, mahoni, nú, has no ai sira seluk-tan ne’ebé iha valór ekonómiku.
“Pagamentu ba plantasaun ita hahú uluk husi Oésilo tuirmai ita halo iha Pássabe to’o fali Pante Makasar”, nia hateten.
Marcelino Corro esplika katak pagamentu primeiru halo ba ai-oan de’it, tanba ne’e nia sujere ba benefisiáriu sira atu utiliza osan ba nesesidade ne’ebé importante, nune’e bele benefisia moris.
Iha biban ne’e, xefe suku Bobometo, José Labi Caet, dehan komunidade sira hein kle’ur mak foin hetan indemnizasaun. “Ha’u hatene projetu ne’e halo antes ha’u sai xefe suku, ne’ebé komunidade sira barak mak hein bainhira mak atu selu, maibé agradese tanba tinan ne’e Governu bele responde ona sira-nia direitu. Tanba ne’e, ha’u lori komunidade afetada sira hato’o obrigadu”, nia dehan.
Sentimentu ksolok mós mai husi Marcos Soni nu’udar abitante afeitadu husi aldeia Usapikolen no nia agradese ba Governu tanba rezolve problema ne’ebé akontese iha pasadu no konsege selu iha Governu ida ne’e.
“Ami sente satisfás, tanba uluk ami koopera hodi entrega ami-nia ai-oan sira atu halo obra ne’e. Agora, Governu mós konsidera ami-nia plantasaun sira”, nia hato’o.
Notísia relevante: Indemnizasaun ba komunidade afetada projetu ZEESM hein publikasaun Jornál Repúblika
Jornalista: Abílio Elo Nini
Editora: Maria Auxiliadora
