OÉ-CUSSE, 08 Outubru 2024 (TATOLI) – Sekretaria Rejionál ba Asuntu Agrikultura, Autoridade Rejiaun Administrativa Espesiál Oé-Cusse Ambeno (RAEOA) simu ona ekipamentu agríkola husi Ministériu Agrikultura, Pekuária, Peska no Floresta (MAPPF) hodi reforsa serbisu agrikultór sira.
Ekipamentu agrikola ne’ebé MAPPF disponibiliza mak hanesan tratór boot rua, hand tractor 25 no ró peska lima.
“Tratór sira-ne’e ita sei hein orientasaun husi Ministériu Agrikultura mak halo lansamentu hodi entrega ba iha Sekretaria Rejionál Agrikultura atu utiliza ba RAEOA, ne’ebé agora sei rai hela iha diresaun”, Diretór Agrikultura Oé-Cusse, Amaro Efi, dehan ba Tatoli, ohin.
Notísia relevante: Primeiru-Ministru lansa distribuisaun ekipamentu agríkola ba munisípiu sira
Ekipamentu hirak-ne’e ho kompromisu ida katak atu tulun RAEOA, nune’e bele dudu setór agrikultura hodi hasa’e produsaun.
“Apoiu ne’e liuhusi koordenasaun bainhira ami asume kargu. Ami halo koordenasaun ho Governu sentrál atu apoia tratór sira, liuliu ba futuru bele atende ita-nia komunidade sira-nia nesesidade, tanba ita hatene Oé-Cusse maioria agrikultór, ne’ebé presiza tebes ekipamentu sira hanesan ne’e atu tulun ba serbisu iha to’os no natar”, nia dehan.
Nune’e, nia promete katak ho ekipamentu agríkola modernu hirak-ne’e sei kria regulamentu forte ba utilizadór sira atu kuída, tanba tratór boot ne’ebé iha funsaun atu tulun serbisu iha natar no to’os.
Notísia relevante: MAPPF eleva koñesimentu tratorista Oé-Cusse kona-ba jestaun ba mákina
Totál tratór ne’ebé daudaun iha Diresaun Rejionál Agrikultura Oé-Cusse hamutuk unidade 21, maibé tolu aat totál, rua sei iha hela prosesu ba halo manutensaun, unidade 16 mak preparadu atu apoia hodi fila rai.
Jornalista: Abílio Elo Nini
Editora: Maria Auxiliadora
