LISBOA, 18 outubru 2024 (TATOLI) – Primeiru Ministru (PM), Kay Rala Xanana Gusmão, hametin kooperasaun ho Prezidente Asembleia Repúblika Portugál, José Pedro Aguilar.
Xefe Governu, esplika, sorumutu ho Prezidente Asembleia Repúblika Portugál, José Pedro Aguilar nu’udar parte espresa sentimentu amizade entre nasaun rua iha kontextu bilaterál ne’ebé konsideradu hanesan maun-alin.
“Ha’u nu’udar Primeiru Ministru, ami ko’alia liu de’it kona-ba relasaun ne’ebé Asembleia Repúblika hala’o hela kooperasaun ho Parlamentu Nasionál,” Xefe Governu hateten.
Xanana nia prezensa iha órgaun soberania Portugál ne’e nu’udar símbolu amizade tanba prezensa iha Portugál nu’udar vizita ofisiál nune’e simbolikamente hasoru lideransa Asembleia Repúblika Portugál hodi ko’alia kona-ba kooperasaun entre órgaun soberania sira.
Asembleia Repúblika Portugál rasik iha kooperasaun ho Parlamentu Nasionál Timor-Leste ligadu ho knaar no kompeténsia sira hanesan fiskalizasaun, monitoriza no aprovoka lei sira.
“Asembleia Repúblika ajuda hela ita-nia Parlamentu Nasionál tanba ita atu aprende husi rai sira-ne’ebé konstrutivu, liuliu tanba ita nu’udar membru CPLP no lian ofisiál Portugés,” Xanana Gusmão akresenta.
Alende ne’e, Primeiru Ministru hasoru no dezeja susesu ba Prezidente Repúblika Portugál, Marcelo Rebelo de Sousa, ne’ebé iha dnkontru ko’alia foka liu relasaun bilaterál entre rai rua ligadu ho konstrusaun estadu no akordu kooperasaun entre nasaun rua.
“Ida-ne’e enkontru formál tanba vizita ofisiál koalia kona-ba mos situasaun internasionál sira,” Xanana Gusmão akresenta.
Prezensa Primeiru Ministru iha Portugál nu’udar vizita ofisiál hafoin hetan konvite formál husi Primeiru Ministru Portugál, Luís Montenegro ne’ebé asina akordu kooperasaun estratéjiku ba tinan-haat 2024-2028.
Notísia relevante: Xanana husu membru CPLP hametin pás no estabilidade iha mundu
Jornalista : Natalino Belo
Editór : Evaristo Soares Martins
