LISBOA, 18 outubru 2024 (TATOLI) – Primeiru Ministru (PM), Kay Rala Xanana Gusmão, husu ba membru Komunidade Lian Portugés (CPLP, sigla Portugés) atu kontinua hametin pás no estabilidade iha mundu.
Primeiru Ministru, Kay Rala Xanana Gusmão, espresa sentimentu kontente relasiona ho vizitasaun iha Sekretariadu CPLP iha Lisboa, Portugál no agradese ba delegasaun membru CPLP ne’ebé sai nu’udar sinál sentidu defende direitu, demokrasia no dezenvolvimentu sustentável iha nasaun membru sira.
Xanana Gusmão, argumenta, sorumutu ho organizasaun CPLP nu’udar parte husi kooperasaun ho nasaun membru lian portugés sira, foka iha área pás no armónia inklui kontribui dezenvolvimentu globál.
“Agora iha uma CPLP atu kontinua esforsu hotu kona-ba akordu kooperasaun entre nasaun hodi haree ba interese dezenvolvimentu jerál sira,” Primeiru Ministru Xanana Gusmão hateten iha Lisboa, kinta ne’e.
Xefe Governu hateten, objetivu delegasaun Timor-Leste iha Portugál relasiona ho konvite Primeiru Ministru Republika Portugál, Luís Montenegro no asina akordu kooperasaun estratéjiku tinan 2024-2028.
Sekretáriu Ezekutivu CPLP, Zacarias Albano da Costa, agradese relasiona no fó benvindu ba Primeiru Ministru, Kay Rala Xanana Gusmão iha Portugál espesiál vizita ona edifisiu komunidade lian portugés.
Prezensa Primeiru Ministru, Xanana Gusmão hamutuk ho membru governu sira iha Sekretariadu CPLP simu direita husi Sekretáriu Ezekutivu CPLP, Zacarias Albano da Costa.
Hafoin ne’e, kontinua ho lansamentu livru rua ho títulu Xanana Gusmão “dalan ba dame” no mauberuadas “Kay Rala Xanana Gusmão” iha salaun Dourado.
Membru organizasaun CPLP rasik hamutuk nasaun sia kompostu Angola, Brazil, Cabo-verde, Brazil, Guiné-Bisau, Moçambique, Portugál, São Tome e Principe, Timor-Leste no Guine Equatorial no ho totál membru observadór hamutuk nasaun 30.
Notísia relevante: MESSK-ME Portugál reforsa kooperasaun rejime asesu iha edukasaun ensinu superiór
Jornalista : Natalino Belo
Editór : Evaristo Soares Martins
