BOBONARO, 28 outubru 2024 (TATOLI) – Ministru Agrikultura, Pekuária, Peska no Floresta, Marcos da Cruz, promete sei halo reabilitasaun ponte riin ba kanál irrigasaun Maliana I iha área Mamaruman, suku Lahomea, ne’ebé hetan estragus tinan hirak liubá.
Ministru Marcos, hateten governu presiza halo reabilitasaun tanba distribuisaun bee barak mak lakon de’it iha dalan.
Nia dehan, daudaun ne’e ekipa tékniku sira halo hela estudu kona-bá kustu ne’ebé presiza hodi halo reabilitasaun ba ponte ne’e.
Notísia relevante: Ponte kanál irrigasaun Maliana I iha Mamaruman haliis
“Kuandu ne’e hotu loos ona maka ita bele aloka orsamentu, ne’ebé ida-ne’e ita-nia responsabilidade, governu buka atu fasilita halo reabilitasaun, konstrusaun no ba fatin sira-ne’ebé maka bee la tama, ne’e ita iha ekipamentu pezadu hodi ke’e sedimentasaun sira-ne’e hodi hatama bee ba natar,” nia ko’alia iha Sentru Extensaun Agríkola, Tunubibi.
Ponte ne’e nu’udar kanál alternativu ida hodi fornese bee ba natar no to’os agrikultór suku Raifun, Lahomea, Ritabou, Odomau no Holsa.
Nune’e mós funsaun hosi ponte referida mós atu fasilita movimentu ema no transporte hanesan motorizada, tanba ne’e nahe ho ai-kabelak, maibé hafoin hetan estragus ikus mai laiha ona movimentu ema no motorizada.
Tuir dadus ne’ebé TATOLI asesu katak, irrigasaun ne’e sei fornese bee ba natar hamutuk ekatre 1.050.
Enkuantu irrigasaun Maliana I reabilita husi parseiru internasionál JICA iha tinan 2009 no obra ne’e hanesan ajuda husi povu Japaun nu’udar sinál amizade no kooperasaun entre Japaun ho Timor-Leste.
Notísia relevante: Komisaun D rekomenda MAPPF kontinua halo manutensaun irrigasaun Maliana I
Jornalista: Sérgio da Cruz
Editór: Evaristo Soares Martins
