DILI, 11 dezembru 2024 (TATOLI) – Ministériu Defeza (MD), Kontra Almirante Donaciano do Rosário da Costa Gomes Pedro Klamar Fuik, ofisialmente entrega karreta tátika 10 ba Komandu FALINTIL-Forsa Defeza Timor-Leste (F-(FDTL).
Karreta tátika 10 ne’e sosa hosi Nasaun China ho orsamentu hamutuk rihun $60 ne’ebé prevee iha Orsamentu Jerál Estadu 2024. Viatura sira ne’e simu direta hosi Xefe Estadu Maiór Jenerál F-FDTL, Tenente Jenerál Domingos Raul Falur Rate Laek iha Kuartél Jenerál Fatuhada.
“Ohin militár simu tan karreta 10 ne’ebé mak hola parte hosi orsamentu jerál 2024 nian, viatura 10 ne’e, hanesan viatura militár ne’ebé mak ita klasifika hanesan viatura tátika uzu administrativu”, Pedro Klamar Fuik hateten ba jornalista sira hafoin konklui distribuisaun karreta.
Nia dehan, viatura hirak ne’e, sei fó ba Komandante kompañia, Komandante pelotaun sira, para bele uza iha terenu hodi haree forsa sira ninia progresaun iha terenu.
¨Viatura hirak ne’e nia funsaun ba uzu militár administrativu. Ita iha hanoin atu bele uniformiza ita-nia militár sira ho viatura ne’ebé mak karaterístika militár, para ita bele hetan sira-nia aprezentasaun hanesan militár¨, katak.
Nia dehan, tanba dezenvolvimentu forsa armada durante tinan 20, militar uza karreta barak ho tipu oioin, maibé tempu ona iha Nono Governu Konstitusionál iha empenamentu atu bele halo transformasaun ba militár sira nian ekipamentu, materiál, atu bele alkansa objetivu ne’ebé mak bolu objetivu modernizasaun forsa.
Klamar Fuik esplika, hosi viatura 10 ne’e, iha alta téknolojia no viatura referida hanesan mós viatura tátika militár sira seluk ne’ebé mak iha kondisaun para atu bele kumpre misaun ida.
“Ita hatene katak ida-ne’e viatura tátika uzu administrativa la’ós ba kombate. Portantu kona-ba prosesu manutensaun ba karreta ne’e sei halo hanesan baibain.
Iha okaziaun ne’e, Xefe Estadu Maior F-FDTL, Tenente Jenerál, Domingos Raul Falur Rate Laek, agradese ba Governu liuhosi Ministériu Defeza, lori tempu ida ne’ebé badak sira investe no dezenvole forsa nia materiál ho ekipamentu militár ba profesionál no modernizasaun.
“Sim, ita kuandu ko’alia kona-ba, profesionalizasaun tenke meius, iha aset ekipamentu, hotu disponivel para ita hare militár sira profisionál. Ita dehan moderniza tenke iha regulamentu própriu hanesan lei hodi regula. Nune’e mós karreta 10 ne’e tenke iha ninia regra uzu, velosidade másimu hira, ninia operasionalidade no ninia manutensaun¨,nia konklui.
Jornalista: Natalino Costa
Editór : Zezito Silva
