DILI, 14 janeiru 2025 (TATOLI)–Diretór Jestaun Merkadu no Turizmu iha Autoridade Munisipál Dili (AMD), Arthur Henriques, hateten Governu liuhusi ekipa jestaun merkadu sei serbisu hamutuk ho Sekretária Estadu Asuntu Toponímia no Organizasaun Urbana (SEATOU), sei la autoriza vendedór sira kontinua fa’an iha espasu públiku.
Nia hateten, relata ekipa konjunta SEATOU nian konsege muda vendedór 800-resin ne’ebé fa’an iha espasu públiku ba iha merkadu Manleuana, maibé negosiante sira balun fila ba fa’an iha Kampung Baru, antigu merkadu Komoro no Elemloi nian.
“Vendedór sira iha fatin sira-ne’e sai husi merkadu Manleuana mak ba fa’an fali iha espasu públiku,” nia hateten ba jornalista sira.
Tuir nia, negosiante sira-ne’ebé fa’an obralan no muda sai husi Aimutin mak agora kontinua fa’an permanente iha merkadu Manleuana.
Nia hateten iha fulan tolu ikus 2024 nian ekipa koloka funsionariu sira iha ne’ebá, entaun negosiante sira la fa’an, maibé daudaun ne’e ekipa iha difikuldade uitoan entaun vendedór sira ba fa’an fali sasán iha espasu públiku.
“Agora ami ema menus no SEATOU nia ema apoia ami ne’e kontratu ramata ona. Ida-ne’e difikuldade ba ami maibé ami sei la nonook. Ami esforsu no organiza, ami pesoál hodi koloka nafatin iha fatin ne’eba,” nia hateten ba TATOLI iha Matadoru.
Diretór ne’e hateten, negosiante sira tenke sai husi fatin públiku ba fa’an iha merkadu Manleuana, Taibessi no ba fa’an iha sira-nia uma ka rai privadu ruma.
Antes ne’e, Xefe Departamentu Jestaun Merkadu iha Autoridade Munisípiu Dili (AMD), Joaquim B. M. Belo, hateten servisu jestaun merkadu sei fó sansaun ka aplika koima ba vendedór sira-ne’ebé kontinua fa’an sasán iha espasu públiku tuir artigu 3º no 10º Dekretu-Lei nú. 3/2008.
Iha artigu 10 Dekretu-Lei númeru 33/2008 hateten, determinasaun husi medida koima halo iha funsaun gravidade ba kontra ordenasaun, sala situasaun ekonómika no benefisiu ekonómiku ne’ebé liuhusi prátika kontra ordenasaun.
Nia hateten, avizu ne’ebé fó sai mak la kumpre ona hanesan avizu eskrita ne’ebé taka ona iha fatin públiku sira atu labele fa’an iha fatin públiku no trotoar leten mak sei fó sansaun ba isra.
“Ami-nia funsionáriu sira kontinua kontrola no kontinua fó avizu verbál ho fuan ba fuan atu negosiante sira labele fa’an iha iha dalan ninin no estasionamentu sira hanesan iha merkadu Taibesi nian,” Xefe Departamentu Jestaun Merkadu iha Autoridade Munisípiu Dili (AMD) ne’e hateten.
Jornalista : Jesuína Xavier
Editór : Cancio Ximenes
