DILI, 20 dezembru 2025 (TATOLI)—Governu Timor-Leste ne’ebé reprezenta husi Ministru Negósiu Estranjeiru no Kooperasaun (MNEK), Bendito dos Santos Freitas ne’ebé akompaña husi Vise-Ministra ba Asuntus ASEAN, Milena Rangel partisipa iha enkontru Ministru Negósiu Estranjeiru ASEAN (MNE-ASEAN) foin lalais ne’e iha Lankawi, Malázia.
Enkontru MNE-ASEAN ne’ebé hala’o iha Sentru Konvensaun Internasionál Langkawi (LICC) Malázia ne’e, Timor-Leste partisipa hanesan observadór.
Enkontru ne’e lidera husi Ministru Negósiu Estranjeiru Malázia, Honoravel Dato ‘Seri Utama Haji Mohamad bin Haji Hasan estadu-membru sira diskute prioridade sira ASEAN nian, inklui relasaun externa sira ASEAN nian ho ninia sentralidade ba evolusaun arkitetura rejionál.
Ministru Negósiu Estranjeiru sira mós iha oportunidade atu troka hanoin kona-ba asuntu rejionál no internasionál sira-ne’ebé interresadu no mós sai preokupasaun komún.
Iha intervensaun, Ministru Negósiu Estranjeiru no Kooperasaun, Bendito dos Santos Freitas, lori Governu Timor-Leste nia naran, kongratula Governu Malázia ne’ebé sei lidera Prezidénsia ASEAN durante tinan 2025.
“Timor-Leste apoia tomak ba Malázia nia Prezidénsia ho tema “Inkluzividade no Sustentabilidade” ho fi’ar metin katak, durante Prezidénsia Malázia nian, sei halo ita-nia rejiaun preparadu liután ho konfiansa hakat ba futuru ida-ne’ebé ekonomikamente integradu, sustentável no reziliente hodi hasoru situasaun globál ho nia dezafiu sira,” Ministru Bendito hateten liu husi nota ne’ebé Agência TATOLI asesu, ohin.
Governante ne’e mós hato’o agradesimentu ba Estadu-membru ASEAN sira-ne’ebé mak fó ona apoiu kontínua n ba Timor-Leste nia adezaun tomak ba organizasaun rejionál ne’e no hato’o liután Timor-Leste nia prontidaun atu konklui prosesu adezaun nian.
Timor-Leste hakarak tebes atu kontribui ba inisiativa rejionál sira-ne’ebé aposta ba hametin pás, seguransa no kreximentu sustentável no hamriik metin ho ASEAN nia vizaun kompartida kona-ba komunidade ida-ne’ebé bazeia ba regra no seluk tan.
Delegasaun Timor-Leste ne’ebé akompaña Ministru Bendito no Vise-Ministra no Líder Senhor Official Meeting (SOM) Timor-Leste nian, Milena Rangel iha retiru MNE-ASEAN ne’e kompostu husi, Embaixadór Timor-Leste ba Malázia, Lisualdo Gaspar, no Diretór Jerál ba Asuntu ASEAN, Elisa da Silva.
Jornalista : Hortencio Sanchez
Editór : Cancio Ximenes
