COVALIMA, 21 janeiru 2025 (TATOLI) – Prezidente Autoridade Munisípiu Covalima, Miguel Armada Cardoso, husu ba dirijente estabelesimentu ensinu sira iha munisípiu Covalima atu utiliza orsamentu konsesaun eskolár tuir matadalan.
“Ohin ita hala’o reuniaun hodi ko’alia kona-ba utilizasaun konsesaun eskolár, ita hakarak identifika problema no obstákulu ne’ebé iha, hafoin ita buka nia solusaun no iha nia desizaun liuhusi akta reuniaun,” Miguel Armada Cardoso hato’o iha salaun servisu edukasaun Covalima, Santa Rosa, ohin.
Autoridade Covalima labele ko’alia barak maibé fó fiar ba asesór partisipa mak hatene liu kona-ba lala´ok utilizasaun orsamentu konsesaun eskolár, tanba ne’e Covalima prontu atu halo reabilitasaun eskola maibé la’ós halo rekonstrusaun.
Ho nune’e, hanesan autoridade fó hanoin ba dirijente eskola sira atu utiliza orsamentu konsesaun eskolár atu jere didi’ak no utiliza orsamentu konsesaun eskolár bazeia ba matadalan ne’ebé mak iha.
Iha sorin seluk, Diretora Servisu Edukasaun Covalima, Elda de Fátima, prezensa Prezidente Autoridade munisípiu Covalima ne’e atu fó hanoin ba dirijente eskola sira oinsá atu utiliza orsamentu konsesaun eskolár.
“Ohin ita-nia prezidente Autoridade munisípiu Covalima ho asesór partisipa, hato’o informasaun no fasilita formasaun ba diretór, xefe gabinete no koordenadór eskola sira kona-ba atu jere orsamentu konsesaun eskolar tanba orsamentu konsesaun eskolár entrega ona mai iha munisípiu Covalima,” nia haktuir.
Razaun Edukasaun Covalima nafatin partilla informasaun ba dirijente eskola sira, tanba molok ne’e Ministériu Edukasaun mak jere rasik maibé daudaun ne’e ME entrega ona mai iha autoridade munisípiu ida-idak mak jere rasik.
Tuir matadalan, konsesaun eskolár eskola uza ba reabilita eskola, maibé agora PAM ho asesór partisipa, orienta ba eskola sira bele halo manutensaun ki´ik hanesan reabilitasaun hanesan kalen-ku´ak bele sosa kalen, bainhira didin atu monu eskola bele sosa batako hodi hadi´a no hadi´a kadeira meza a´at.
Diretór EBC Ogues Antoninho da Costa hateten, Serisu Edukasaun Covalima konvida diretór eskola sira atu rona informasaun kona-ba utilizasaun orsamentu konsesaun eskolár ne’ebé apoiu hosi Ministériu Edukasaun (ME).
“Ohin ami mai partisipa enkontru simu informasaun kona-ba utilizasaun orsamentu konsesaun eskolár tanba durante ne´e ami dúvida ezekuta orsamentu konsesaun eskolár liuhusi enkontru ohin hodi fó hanoin ba dirijente sira atu bele jere di’ak liu liga ho matadalan ezekusaun konsesaun eskolár,” nia dehan.
Tanba durante ne’e eskola sira hasoru difikuldade atu ezekuta orsamentu konsesaun eskolár tuir matadalan kona-ba manutensaun reparasaun ki´ik no maior; dala ruma diretór eskola sira ta´uk atu ezekuta nune’e liuhusi enkontru bele rona informasaun ho detallu nune’e bele jere orsamentu konsesaun eskolár ho di’ak.
Orsamentu konsesaun eskolár iha 2024 ba Eskola Bázika Centrál ( EBC) Ogues hamutuk rihun-10 resin. Husi orsamentu ne’e, orsamentu ba EBC Ogues hamutuk $ 5910, restu fahe eskola bázika filiál Matai,Goronto no Nadak.
Fó hanoin fali katak, Ministériu Edukasaun (ME), atribui konsesaun eskolár ba eskola fahe ba kategória hanesan ba eskola pre-eskolár bazeia dekretu lei númeru 84 artigu 7º ne’ebé altera husi dekretu lei númeru 3/2016 kona-bá estatutu administrasaun munisipál no atribui konsesaun eskolár ba ensinu báziku tuir dekretu lei númeru 32/2023 artigu 69º kona-ba gastu orsamentu konsesaun eskolár tuir nesesidade eskola.
Governu atribui konsesaun eskolár fahe ba kategória hanesan, konsesaun eskolár ba ensinu pre-eskolár ne’ebé responsabiliza husi munisipál ho nia orsamentu kada estudante $ 0.75 no konsesaun eskolár ba ensinu báziku reponsabiliza ba Ministériu Edukasaun ho nia orsamentu kada estudante $ 2.00.
Tuir dadus estudante ensinu pre-eskolár públiku ba tinan-2024 hamutuk 1, 604 ne’ebé nia orsamentu ba fulan neen hamutuk $7,812.00 husi orsamentu inisiál $ 15,705.00 no alunu ensinu Báziku direitu ba konsesaun eskolár husi eskola BEC 20 ho nia filiál 63 hamutuk 14,174 ho totál orsamentu hamutuk $ 170,088.00
Jornalista: Celestina Teles
Editór :Rafael Ximenes de A. Belo
