KOVALIMA, 18 fevereiru 2025 (TATOLI)– Servisu Saúde Munisípiu Kovalima forma ona ekipa atu halo investigasaun relasiona ambulánsia Multi-funsaun ho xapa mátrikula G 07088 baku fila iha Kampung Baru, Postu administrativu Zumalai, Kovalima, no viraliza iha rede sosiál, Facebook.
Diretór servisu saúde Munisípiu Kovalima Domingos Sequeira, rekoñese ambulánsia Multi-funsaun baku fila duni iha Kampung Baru Zumalai iha tuku 11:00 kalan, bainhira tula pasiente emerjénsia atu transporta mai iha Ospitál referál Suai.
“Asidente tráfegu ne’e akontese iha loron 16 fevereiru ne’e, iha 17 fevereiru ne’e ami foti ona karreta ambulánsia multi-funsaun mai rai iha Servisu Saúde Kovalima”, Domingos Sequeira klarifika ba jornalista iha nia servisu fatin Tabakolot, ohin.
Hafoin akontesimentu asidente tráfegu, Diretór saúde mós vizita pasiente iha Ospitál Suai hodi hatene nia kondisaun di’ak uitoan ona.
Pasiente moras la’ós tanba akontese asidente tráfegu mak moras la’e, maibé motorista tula pasiente ho kondisaun moras mak husi sentru Saúde Zumalai transfere mai iha Ospitál no to’o iha dalan hetan asidente tráfegu.
Dirijente ne’e klarifika katak bazeia informasaun ne’ebé espalla iha mídia sosiál motorista ho kondisaun lanu nia parte seidauk bele fó informasaun tanba ekipa sei halo investigasaun hodi rekolla informasaun detallu kona-ba akontesimentu referidu.
“Ha’u mós akompaña hela informasaun ne’ebé lansa iha mídia sosiál dehan motorista lori karreta ho kondisaun lanu ida-ne’e ha’u seidauk bele fo informasaun nia lanu duni la’e tanba ne’e mak ha’u forma ona ekipa atu halo investigasaun atu hatene lolos nune’e ita bele foti desizaun”, nia haktuir
Liuhusi rezultazu investigasaun bainhira motorista kondús karreta ho kondisaun lanu dirijente ne’e sei foti desizaun hodi hapara motorista referidu.
Iha sorin seluk, Administradór postu Zumalai Alípio Magno reforsa katak hanesan autoridade rona informasaun akontese duni asidente tráfegu ambulánsia Multifunsaun baku fila maibé kondisaun pasiente di’ak.
“Ha’u rona informasaun ambulánsia baku fila duni bainhira transporta pasiente emerjénsia husi sentru Saúde Zumalai mai iha Ospitál referál Suai” nia informa.
Jornalista:Celestina Teles
Editór :Rafael Ximenes de A. Belo
