KOVALIMA, 22 Fevereiru 2025 (TATOLI) – Ministru Interitór, Francisco da Costa Guterres, fó hanoin ba membru Polísia Nasionál Timor-Leste (PNTL) iha Kovalima tenke presta serbisu ho disiplina, nune’e instituisaun funsiona ho di’ak.
“Disiplina tenke prega iha ita-boot sira-nia fuan, sai hanesan parte integradu ba membru PNTL no ierarkia”, governante ne’e dehan iha ámbitu hala’o vizita bá Komandu PNTL Kovalima, sábadu ne’e.
Tuir nia, liuhusi disiplina mak membru sira bele hatene sé mak komanda no simu orientasaun husi sé. “Liga ba kestaun ierarkia labele haree ba ema, maibé orden mai husi komandante tenke kumpre, bainhira la konkorda halo reklamasaun”, nia salienta.
Tanba ne’e, hanesan membru tenke ezekuta orden ne’ebé mai husi komandante no labele la’o sees, tanba disiplina ho ierarkia mak hatudu intituisaun PNTL nia imajen iha públiku. “Disiplina no ierarkia mak sei reponde ba povu nia konfiansa no esperansa ba PNTL no sei hala’o serbisu ho di’ak liu”.
Iha sorin seluk, Segundu Komandante Jerál PNTL, Komisáriu Pedro Belo, reforsa katak PNTL tenke mantein disiplina no obedese mós ba nia ierarkia hahú husi ajente ba ajente prinsipál, susperintendente xefe to’o iha komisáriu jerál.
“Kargu labele prega ba ita-boot sira-nia fuan, maibé disiplina mak ita tenke kuda iha ita-nia fuan tanba disiplina mak fó iis ba ita moris ba PNTL no iha fatin ne’ebé de’it”, realsa.
Iha sorin seluk, Komandante PNTL Kovalima, Superintendente Inácio Amaral, aprezenta katak PNTL ne’ebé presta sira-nia serbisu hodi garante seguransa iha Kovalima hamutuk 159, husi númeru ne’e na’in-88 koloka bá eskuadra hitu.
Kolokasaun membru PNTL sira iha Eskuadra Suai na’in-22, Tilomar 11, Fohorem 12, Fatululik neen, Fatumea sia, Maucatar sanulu no Zumalai 18.
PNTL Kovalima aprezenta difikuldade ne’ebé hasoru
Superintendente Inácio Amaral aprezenta mós difikuldade sira, liuliu falta rekursu no transporte ba Ministru Interiór no ba Komandu Jerál PNTL.
Nia dehan PNTL Kovalima iha-nia seksaun hitu mak hanesan Gabinete Komandante PNTL, operasaun, administrasaun, tránzitu rodaviária, investigasaun no kriminál, forsa rezerva no sesaun justisa.
“Ami hala’o serbisu hasoru obstákulu. Menus rekursu umanu atu koloka iha munisípiu no eskuadra hodi troka OPS ho idade reforma, transporte ba OPS laiha, laptop maioria avaria, laiha kámara ba sesaun investigasaun kriminál no ba tránzitu. Presiza reabilita edifísiu eskuadra hitu ho sela detensaun ladún di’ak”, Inácio Amaral dehan.
Nia salienta Komandu PNTL Kovalima destaka ona OPS ba suku 30 ne’ebé kada OPS iha motorizada ne’ebé uza ona durante tinan 10-resin, tanba ne’e presiza atu sosa motorizada foun hodi aopia serbisu. Aleinde ne’e, kazerna ba PNTL hamutuk 10, maibé presiza halo reabilitasaun tanba tinan 10-resin ona.
Hatán ba preokupasaun Ministru Francisco da Costa Guterres hateten atu reabilita eskuadra polísia ne’e tau ona iha planu. “Ita sei hahú hadi’a infraestrutura eskuadra lima ho kazerna lima ba polísia sira iha munisípiu no sei konstrui uma 50, nune’e ita hahú moderniza infraestrutura PNTL hodi presta serbisu ho di’ak liu”, governante ne’e dehan.
Kovalima ho luan área kilómetru 206.7 ne’ebé baliza ho Indonézia no tuir Sensu 2022, iha totál populasaun 73.909 ho nia xefe família 15.566
Notísia relevante: Komandu Jerál PNTL alerta ba membru sira uza arma ho kuidadu
Jornalista: Celestina Teles
Editora: Maria Auxiliadora
