KOVALIMA, 24 fevereiru 2025 (TATOLI) –Vítima ba inséndiu ne’ebé akontese iha aldeia Sadahur, suku Maudemo, postu Tilomar, munisípiu Kovalima, hetan ona apoiu emerjénsia hanesan alimentasaun inklui nesesidade bázika emerjente sira seluk husi Autoridade protesaun sívil (APC, sigla portugés) hamutuk ho Servisu munisípiu protesaun sívil jestaun risku dezastre naturál (SMJRDN).
Kauza husi ahi-han ne’e rezulta sasán uma-laran sira la iha ida mak salva.
Kronolojia inséndiu ne’e tuir vítima Angelo Ferreira, akontese iha tuku 02:00 iha loron 23 fevereiru. Akontesimentu ne’e, vítima ho nia feton Santina Moniz la konsege salva sira-nia sasan uma-laran.
“Inséndiu akontese ne’e ha’u la hatene nia kauza tanba ami kalan sunu de’it lampu tradisionál bainhira ahi kona ha’u-nia liman mak ha’u fanun ha’u-nia feton ho nia bei-oan hodi halai sai nune’e ahi han mutuk uma ona”, nia konta.
Uma ne’ebé ahi han ne’e, ema na’in haat mak iha laran; Angelo Ferreira ho nia feton Santina Moniz no mós bei-oan na’in rua.
No, kauza husi ahi han ne’e, iha uma-laran la konsege sasán sira hanesan telefone Android ida, osan $350,00, belak mean ida, motor marka Supra X ho batar bidon rua.
Ho akontesimentu no momentu tristeza ne’e, APC- SMJRDN, halo ona intervensaun hodi fó apoiu emerjénsia.
“APC- SMPSJRDN ita fó apoia emerjénsia hanesan ai-han ho la’ós (ai-han) ba vítima inséndiu iha Tilomar”, Komandante APC Kovalima Celestino Afonso Ferreira informa ba jornalista sira, iha aldeia Sadahur Tilomar, ohin.
Autoridade protesaun sívil esplika, hafoin fó apoia emerjénsia, atu kontinua apoia materiál koperasaun maibé vítima la prense kritéria tanba vítima hela iha rai Estadu no hela iha to’os entaun evidénsia ladun forti atu submete relatóriu ba nasionál hodi halo prosesu atu hetan apoiu materiál rekuperasaun.
“Ita-nia lidér lokál sei buka meiu ajuda vítima inséndiu hodi konstrui nia uma nune’e vítima bele hela. Ami labele foti desizaun maibé husi nasionál mak deside”, nia esplika.
Entretantu, apoiu ne’ebé vítima inséndiu hetan husi APC mak susu-been Dancow haat, Khon Guan ida, foos kilograma 25 saku ida, basia ida, sardinas dos ida, Mina Goreng litru tolu da, Fam Kits ida, Supermie dos ida, Aqua dos ida, masin-midar kilograma rua, biskuit Aim pack rua no kafé kilograma rua.
Apoiu la’ós ai-han ka naun-alimentár kompostu husi lona, bikan, sanan, tasu no seluktan nune’e bele hakmaan netik vítima sira-nia sofrementu iha momentu difísil ne’e nune’e bele harii barraka hodi hela provizóriu.
Jornalista:Celestina Teles
Editór: Rafael Ximenes de A. Belo
