DILI, 24 Fevereiru 2025 (TATOLI)-Parlamentu Nasionál (PN) liuhusi sesaun reuniaun plenária segunda ne’e, aprova proposta-lei númeru 15/VI(2a)-alterasaun dahuluk ba lei númeru 18/2007, 18 iha finál globál.
Deputadu sira aprova proposta-lei kona-ba Rejime Tranzitóriu Rekrutamentu Majistradu no Defensór Públiku la’ós timoroan no alterasaun daruak lei númeru 9/2011, 17 agostu, ne’ebé aprova Orgánika Kámara Konta Tribunál Superiór Administrativu, Fiskál no Konta ho votu a-favór 37, kontra 16 no abstensaun 0.
“Ne’ebé votasaun ida ne’e pasa”, Prezidente Parlamentu Nasionál, Maria Fernanda Lay, fó sai iha sala plenária.
Ho aprovasaun ne’e, meza envia hikas proposta-lei ne’e ba komisaun A ne’ebé trata asuntu Justisa no Konstituisionál hodi bele halo redasaun finál hafoin Prezidente PN sei envia proposta-lei ne’e ba Prezidente Repúblika mak iha kompeténsia eskluziva atu promulga ka veta.
Notísia relevante:Komisaun A finaliza diskusaun rejime rekrutamentu majistradu iha faze espesialidade
Tuir testu orijinál proposta-lei ne’e Governu pretende atu altera artigu hamutuk ualu iha lei vijente lei númeru 1/2017, 18 janeiru, hanesan artigu 1, 2, 3, 4, 5, 7, 12 no 13.
Antes ne’e, Ministru Justisa (MJ), Sergio Hornai, hateten proposta-lei ne’e mai atu introdús hanoin sira bá mudansa espesífiku iha rejime tranzitória ida ba rekrutamentu juíz, prokuradór no defensór la’ós timoroan atu bele mai halo serbisu tolu importante mak atu hametin reforsu serbisu inspesaun, asesória no mentoria ninian.
“Objetivu prinsipál husi lei ida ne’e nian mai atu bele fó tan enfaze ida ba lei estruturante vijente ne’ebé sei iha hela komísu balun, hodi nune’e bele fó reforsu liu-tán bá iha lei vijente ne’ebé iha”, nia akresenta.
Notísia relevante: Rejime Tranzitóriu Rekrutamentu Majistradu no Defensór Públiku aprovadu iha jeneralidade
Jornalista : Nelson de Sousa
Editora : Rita Almeida
