DILI, 19 Fevereiru 2025 (TATOLI)-Komisaun A iha Parlamentu Nasionál (PN), finaliza diskusaun iha faze espesialidade ba proposta-lei númeru 15/VI(2a)-primeriu alterasaun lei númeru 18/2007, 18.
Tan ne’e, komisaun haree hela relatóriu diskusaun ba proposta-lei kona-ba Rejime Tranzitóriu Rekrutamentu Majistradu no Defensór Públiku la’ós timoroan no alterasaun daruak lei númeru 9/2011, 17 Agostu ne’ebé aprova Orgánika Kámara Konta Tribunál Superiór Administrativu, Fiskál no Konta.
“Debate espesialidade hotu ona, agora ami haree relatóriu debate espesialidade atu submete ba meza hodi ajenda diskusaun ba finál global”, Prezidente Komisaun A, Patrocínio dos Reis Fernandes, hato’o hafoin sorumutu komisaun iha resintu PN, kuarta ne’e.
Nia dehan durante diskusaun espesialidade iha proposta balun, maibé la’ós altera nia substánsia maibé armoniza kestaun redasaun hodi bele iha klareza.
Komisaun hala’o diskusaun iha espesialidade foka bá artigu ida-idak. Tuir testu orijinál proposta-lei ne’e Governu pretende atu altera artigu hamutuk ualu iha lei vijente lei númeru 1/2017, 18 janeiru, hanesan artigu 1, 2, 3, 4, 5, 7, 12 no 13.
Ministru Justisa (MJ), Sergio Hornai, hateten proposta-lei ne’e mai atu introdús hanoin sira ba mudansa espesífiku iha rejime tranzitóriu ida bá rekrutamentu juís, prokuradór no defensór la’ós timoroan atu bele mai halo serbisu importante mak hametin reforsu serbisu inspesaun, asesória no mentoria ninian.
“Objetivu prinsipál husi lei ida ne’e nian, enfaze lei estruturante vijente ne’ebé sei iha hela komísu balun, nune’e bele fó reforsu liu-tán bá lei vijente ne’ebé iha”, akresenta.
Liuhusi sesaun plenária iha 11 Fevereiru 2025, aprova ona proposta-lei ne’e iha faze jeneralidade ho votu a-favór 38 , kontra 0 no abstensaun 14.
Notísia relevante: KM aprova alterasaun dahuluk ba lei rejime tranzitóriu rekrutamentu majistradu-defensór públiku
Jornalista : Nelson de Sousa
Editora : Rita Almeida
