DILI, 04 dezembru 2024 (TATOLI) – Konsellu Ministru, kuarta ne’e, aprova projetu Proposta Lei kona-ba alterasaun dahuluk ba Lei númeru 1/2017, loron 18 fulan-janeiru, Rejime Tranzitóriu Rekrutamentu Majistradu no Defensór Públiku sira ne’ebé la’ós timoroan.
Alende ne’e aprova mós alterasaun daruak ba Lei númeru 9/2011, loron 17 fulan-Agostu, ne’ebé aprova orgánika Kámara Kontas Tribunál Superiór Administrativu, Fiskál no Kontas nian.
Proposta ne’e, aprezenta husi Ministru Justisa, Sérgio de Jesus Fernandes da Costa Hornai, no Koordenadora Grupu Traballu ba Reforma Setór Justisa, Lúcia Lobato.
“Alterasaun sira ne’ebé propoin maka revizaun husi siklu kontratuál sira, ne’ebé agora sei dura ba tinan ida, bele renova ba de’it tinan ida tan, ho objetivu atu evita prolongamentu sira ne’ebé la nesesáriu no promove troka esperiénsia sira entre profisionál sira,” Vise-Ministru Asuntu Parlamentár Aderito Hugo da Costa hateten ba jornalista sira hafoin reuniaun Konsellu Ministru termina.
Ba Tribunál superiór sira, kandidatu sira pelumenus tenke iha esperiénsia tinan 20, inklui serbisu iha instituisaun internasionál sira ho funsaun hanesan ho ne’ebé iha Timor-Leste.
Juiz, prokuradór no defensór públiku admitidu sira, iha situasaun exesionál, bele ezerse funsaun iha tribunál timorense, naran katak sira kumpre kondisaun espesífika sira, hodi garante kontinuidade justisa no evita kadusidade direitu fundamentál sira.
“Rejime ida-ne’e atu garante kualidade no kontinuidade administrasaun justisa nian, apoia dezenvolvimentu no progresaun karreira majistradu timoroan sira nian no salvaguarda direitu no sidadaun sira-nia interese. Ida ne’e proposta Lei sei lori ba Parlamentu atu halo diskusaun,” Hugo hakotu.
Jornalista: Hortencio Sanchez
Editór : Florencio Miranda Ximenes
