VIETNAME, 26 Fevereiru 2025 (TATOLI)—Prezidente Repúblika, Jose Ramos Horta, husu no rekomenda ba Governu no Banku Sentrál Timor-Leste atu uza fundu soberanu kria fali fundu espesiál ida ba investimentu nasionál no privadu iha Timor-Leste, tanba osan rezerva fundu tezoru iha amerikanu no rai seluk tan durante ne’e rai-metin no la uza ba halo buat ida.
Notísia Relevante: PR Horta sai oradór xave iha abertura Fórum Futuru ASEAN 2025
Tuir Horta, liuhusi fundu investimentu ne’e bele dada mós imvestidór husi rai-li’ur mai investe iha Timor-Leste.
“Entaun ho fundu Soberanu ne’e Timor bele kria fundu espesiál ida só diresionada ba investimentu nasionál no privadu, maibé haree mós ita hakarak dada investidór husi rai-li’ur. Ita hateten ba sira, ami hakarak imi harii otél lima, ami presiza, tanba atu tama ASEAN tenke simu ema no promosaun Turizmu. Entaun, liuhusi fundu investimentu ida-ne’e hateten ba sira, imi tau millaun $100, ami tau millaun $25 no millaun $50. Ne’e mak ha’u hateten, hanoin kreativamente hatene ekonomia para Timor bele book-aan aselera ba oin,” PR Horta hateten iha Otél Meli Hanoi, Vietname.
Horta subliña, aplikasaun fundu imvestimentu ne’e tenke liuhusi parseria ho investidór timoroan sira-ne’ebé daudaun ne’e investe sira-nia osan iha setór aero, turizmu no agrikultura pekuária, bee-moos no seluk tan.
“Ita importa bee barak loos, 40 mil por ano. Maibé, iha kompañia tolu pelumenus investe iha rai-laran mak Gota, Leste no Fresca, Nusa mak ita-nia Governu la apoia ema sira-ne’e para hadi’a di’ak liután teknolojía foun, Seluk tan, hanesan produsaun manu, manu-tolun, ita importa manu husi Brazíl dook tebe-tebes,” nia dehan.
Notísia Relevante: Vietname konsistente apoia adezaun TL ba ASEAN
Jornalista : Sérgio da Cruz
Editór : Cancio Ximenes
