LAUTEIN, 05 marsu 2025 (TATOLI)—Prezidente Autoridade Munisípiu (PAM) Lautein, Melio de Jesus, rekoñese setór eduksauan iha munisípiu Lautein sei enfrenta difikuldade hanesan infrastrutura báziku.
“Setór edukasaun iha Lautein ita enfrenta difikuldade hanesan eskola nia kondisaun ladun di’ak ba ita nia oan sira atu aprende, eskola balu laiha mobiliáriu eskolár, maibé ita konsege rezolve uitoan-uitoan ona,” Melio hateten ba Agência TATOLI iha nia kna’ar fatin iha edifisiu PAM Lautein, tersa (04 Marsu 2025) ne’e.
Nia dehan, eskola barak mak kondisaun laduun di’ak ne’e parte munisípiu foti ona desizaun atu reabilita no konstrui.
“Ba difikuldade hirak ne’e ita konsege rezolve uitoan-uitoan, ita konstrui ona eskola rua iha Leusari no apoiu ida husi Embaixada Japaun, entaun ita konstrui eskola tolu iha Leusari. Ida, iha Ligidika Serilau, ida iha Kuluhun, Japaun mós apoiu halo eskola ida iha Lorehe, eskola ida mós ita konstrui iha Luro Barikafa nian. Eskola hirak ne’e maioria ita halo ona inaugurasaun,” nia hateten.
Konstrusaun ba eskola sira iha Munisípiu Lautein sei kontinua to’o 2028, atu nune’e bele rezolve problema infraestrutura ba setór esdukasaun iha Munisípiu Lautein.
“Ita-nia alvu to’o 2028 eskola sira iha Lautein ho kondisaun ladi’ak ita hadi’a hotu ona. Ita haree rasik hanesan eskola sira iha Rasa ninian moru laiha, entaun ita tama iha Planu Nasionál Dezenvolvimentu Suku (PNDS) hodi konstrui tiha moru ba eskola ida iha Rasa ninian. Ida-ne’e mak ha’u-nia orientasaun ba Xefe Suku sira, Administradór Postu sira tenke hatama proposta prioridade ida, atu nune’e programa PNDS nian bele tuur hamutuk haree hodi tau prioridade hadi’a eskola sira-ne’ebé ho kondisaun aat,” nia relata.
Iha parte seluk, PAM Lautein mós iha ona planu ba oin atu reabilita rezidénsia ba profesór sira kada eskola ne’ebé antes ne’e iha ona, nune’e profesór sira bele hela besik eskola.
“Rezidénsia antigu ba profesór sira iha eskola balun sei iha, ida-ne’e mós importante ba ita atu reabilita fali, nune’e profesór sira bele hela besik eskola mak hanorin ita-nia oan sira. Dalabarak Profesór sira lakohi ba hanorin dook tanba iha eskola ne’ebé sira hanorin laiha fatin seguru ba sira atu hela. Maibé, infraestrutura bázika sira antigu ne’e iha hela, entaun ita tenke hadi’a uma sira-ne’e atu ita-nia profesór sira hela. Ida-ne’e mak programa PNDS ne’e ita atu haree ba fatór sira-ne’e,” nia dehan.
Jornalista : Hortencio Sanchez
Editör : Cancio Ximenes
