DILI, 15 Marsu 2025 (TATOLI)—Administradór Postu Administrativu Turiskai, Abrão de Jesus Nunes, informa komunidade suku tolu iha Turiskai, Munisípiu Manufahi, seidauk asesu eletrisidade.
Nia dehan, suku tolu ne’ebé seidauk asesu eletrisidasidade mak Suku Matorek, Manumera no Kaimauk.
“Husi Suku Kaimauk ne’ebé seidauk asesu eletrisidade ne’e akontese iha Aldeia Lemano, Suku Matorek iha Aldeia Fatu Hei no Foho Tu. Enkuantu, Suku Manumera ne’e iha Aldeia Toilero,” Abrão hateten ba TATOLI iha Turiskai,” sábadu ne’e.
Nia dehan, suku tolu ne’ebé seidauk asesu eletrisidade ne’e sai preokupasaun boot ba komunidade durante ne’e tanba afeta ba labarik sira-nia estudu iha tempu kalan no susar atu asesu ba teknolojia. Durante ne’e lilin no ahi-fafulun mak sai altrernativa hodi fó naroman ba sira.
“Komunidade ne’e tinan naruk la asesu eletrisidade. Tempu badak nia laran sei ko’alia ho Prezidente Autoridade Munisípiu Manufahi para buka solusaun ba kestaun ne’e,” nia informa.
Aleinde ne’e, Administradór Postu Administrativu Turiskai ne’e dehan estrada husi Suku Matorek ba Manumera kondisaun kotu tanba kauza husi udan boot foin lalais ne’e.
“Foin daudaun ha’u informa ona ba administradór munisípiu no nia hateten fulan ne’e nia laran sei koordena ho Ministériu Obra Públika hodi buka solusaun ba problema ne’e,” nia konklui.
Jornalista: Natalino Costa
Editór: Xisto Freitas da Piedade
