VIKEKE, 23 Abríl 2025 (TATOLI)—Vigáriu Parokia Igreja Imaculada Conceição Vikeke Vila. Pe. Arlindo Leonardo Siqueira da Silva, husu sarani sira iha munisípiu Vikeke reza ba sua santidde Papa Francisco nia mate, durante lutu semana ida-ne’e nia laran.
Notísia Relevante: Governu dekreta Lutu Nasionál durante loron hitu ba falesimentu Papa Francisco
“Ita sarani hotu sente triste rona papa Francisco ninia mate, Amu-Papa nu’udár ulun universál kreda Katóliku nian, nune’e mós nu’udar susesór São Pedro no nu’udár vigáriu kristu ne’ebé sai bibi atan di’ak ne’ebé durante ne’e tau matan ba sarani no kreda nian. Ita-nia Governu fó-sai ona lutu semana ida, ne’ebé durante lutu semana ida-ne’e, sarani sira ida-idak bele loro-loron mai reza ba ita-nia Amu-Papa iha igreja,” Pe. Arlindo Leonardo Siqueira da Silva hateten ba Agência TATOLI, iha igreja, ohin.
Nai lulik ne’e relembra, bainhira rona novidade ida-ne’e sente triste tanba foin lalais foin halo fulan-ualu liu ba kotuk, Amu-Papa Francisco hala’o ninia vizita pastorál no vizita Estadu mai Timor-Leste, iha 09-11 Setembru 2024 ne’e, maibé hakotu iis ona.
“Nune’e, ha’u hanoin memória Amu-Papa Francisco nian ne’e seidauk moos, iha ita hotu-hotu ninia ulun. Iha parokia Vikeke Vila, tersa (22/04) horisehik, halo ona misa requiem ida iha nivel parokia, ita mós tau Amu-Papa ninia fotografia iha uma kreda laran. Aleinde ne’e, iha resintu igreja Imaculda tau ona bandeira nasionál, bandeira Vatikanu nian. Ida-ne’e, ita kria ambiente ida-ne’ebé hatudu lakon ita-nia líder boot Amu-Papa Franscisco,” nia dehan.
Tuir nia, parokia Vikeke Vila halo programa ida sei halo misa requiem dala ida tán, iha loron fúnebre ba Papa Francisco nian ne’ebé sei hala’o iha Roma, iha ne’e mós sei realiza misa requiem iha Igreja Imaculada Conceição Vikeke Vila.
“Ami halo ona programa misa requiem maibé ita sei hein programa husi Vatikanu bainhira mak halo fúnebre ba Papa Francisco nian, ita sei hamutuk ho sarani sira konsentra iha igreja husu misa. Depois misa ramata, ita kontinua sunu lilin no kari ai-funan iha krús boot, iha resintu igreja nian,” nai lulik ne’e dehan.
Iha fatin hanesan, sarani Vikeke, Adelino da Costa Soares, haktuir hanesan sarani sente triste tanba lakon bibi-atan di’ak ida.
“Iha tinan kotuk, mai vizita Timor-Leste hanesan sarani orgullu maibé la to’o tinan ida, aman Maromak bolu ona. Tan ne’e, iha tempu ne’ebé ita rona ita-nia Papa Francisco mate, nu’udár sarani hato’o sentidu kondolénsia,” nia dehan.
PNTL Vikeke husu abitante sira hakmatek
Aleinde ne’e, Komadante Polísia Nasionál Timor-Leste (PNTL) munisípiu Vikeke, Superintedente António Rego Fernandes, husu abitante sira iha munisípiu Vikeke hakmatek hodi hasa’e orasaun ba sua santidade Papa Francisco nia mate.
“Relasiona ho papa Frncisco ni mate, ita-nia Governu fó-sai ona dekretu Governu hahú horisehik to’o loron 28 ne’e lutu nasionál. Tempu hakmatek ne’ebé ita hotu halo orasaun hodi ita-nia Papa nia klamar bele hetan fatin iha aman Maromak nia kadunan,” Superintedente António Rego Fernandes hateten ba Agência Tatoli, iha postu Vikeke Vila, ohin.
Komadante PNTL Vikeke ne’e dehan, PNTL sei sensibliza dekretu-lei Governu nian kona-ba lutu nasionál ba komunidade munisípiu Vikeke tomak atu sira bele komprende lutu nasionál durante semana ida.
“Maibé, ba komunidade ne’ebé mak la rona no halo perturbasaun ruma iha fatin públiku sira, ami sei inpoin lei no orden ba sira-ne’ebé kontra ka viola,” nia dehan.
Tanba ne’e, nia dehan, sarani katólika oin loron iha tristeza nian laran bainhira rona sua santidade Papa Francisco fila hikas ba aman Maromak nia kadunan santa.
“Ita hotu-hotu sente triste rona sua santidade Papa Francico nia mate, iha tinan kotuk Papa Francisco mai vizita Timor-Leste, horisehik ita rona fali lia-rekadu ida, tristeza ba ita hotu,” nia hateten.
Jornalista : Vitorino Lopes da Costa
Editór : Cancio Ximenes
