KOVALIMA, 26 Abríl 2025 (TATOLI) – Sarani Kátolika iha munisípiu Kovalima hala’o prosesaun hodi tau ai-funan no sunu lilin, iha monumentu estatua Nossa senhora Ave Maria Suai, relasiona ho sua santidade papa Francisco hakotu ona nia jornada moris, iha loron 21 Abríl ne’e.
Molok tau ai-funan no sunu lilin, autoridade Kovalima hamutuk ho sarani sira lori lilin no ai-funan hala’o prosesaun husi Igreja Nossa Senhora de Fátima Suai ba to’o iha monumentu estatua Nossa senhora Ave Maria Suai.
Padre pároku Igreja Nossa Senhora de Fátima Suai, Amu Aderito da Costa Vilár Morreira foti desizaun hodi tau ai-funan no sunu lilin iha momentu estatua Nossa Senhora Suai , tanba papa Francisco molok atu hala’o nia misaun nia sempre husu na’in feto nia tulun.
“Ha’u foti desizaun tau ai-funan no sunu lilin iha momentu Nossa senhora, relasiona sua santidade papa Francisco nia biografia ita rona iha média sira katak molok atu hala’o viajen atu hala’o misaun nia sempre husu na’in feto nia tulun hodi harohan da’et”, Amu Aderito da Costa Vilár Morreira, dehan ba jornalista , hafoin tau ai-funan no sunu lilin iha monumentu Nossa senhora Suai, ohin.
Ho nune’e pároku Suai hamutuk hodi tau ai-funan no sunu lilin hanesan hatudu domin no hato’o agradesimentu ne’ebé kle’an ba Papa Francisco nia domin mai Timór tanba ne’e timor-oan hasa’e liuhusi sunu lilin iha estatua Nossa senhora nune’e bele tulun ema hotu.
“Nailulik mós husu harohan da’et Papa Francisco nia bensaun ba ita hotu no ba autoridade sira no ba ema hotu idaidak hala’o nia misaun tuir banati tuir papa Francisco ne’ebé husik hela mai ita”, nia konta.
Sua santidade papa Francisco hakotu nia jornada moris nune’e halo sarani tomak iha Kovalima sente triste lakon figura, tanba papa Francisco hanesan São Pedro nia saseluk.
Iha sorin seluk, Sekretáriu Munisipal Administrasaun no Finansa, Albeto Moniz de Araújo, Sarani sira hotu konsetra iha ne’e hodi tau ai-funan no sunu lilin relasiona sua Santidade Papa Francisco ramata ona nia peregrinasaun iha mundu.
“Autoridade Kovalima sei lembra mensajen husi Sua Santidade Papa Francisco bainhira vizita mai iha Timor-Leste hateten katak “ Ha’u hadomi Timor no Timor iha Ha’u-nia fuan ho mensajen ida ne’e fanun ita sarani sira hotu atu matan moris neon na’in”nia fó hanoin.
Notísia relevante:Vizita Papa Francisco fó hanoin ba Timor-oan atu hadomi uma-kreda
Jornalista:Celestina Teles
Editór: Rafael Ximenes de A. Belo
