VIKEKE, 10 Maiu 2025 (TATOLI)- Ministra Saúde (MS) Élia A.A. dos Reis Amaral, hateten Estudante sira iha Timor-Leste presiza haburas kultura lee tanba livru mak janela mundu hodi buka informasaun, referénsia no matenek atu hasa’e koñesimentu.
Governante ne’e hato’o enkorajamentu iha selebrasaun loron mundiál lee livru ba estudante Ensinu Báziku Filiál (EBF) 65, suku Uma Tolu, postu Lakluta, munisípiu Vikeke.
“Ohin ita selebrasaun loron mundiál lee livru nian. Livru nu’udar oportunidade espesiál ida, atu ita esplora mundu. Lee la’ós de’it kona-ba liafuan, maibé mós kona-ba koñesimentu no mehi ne’ebé bele lori ita ba fatin ne’ebé de’it. Tan ne’e, Ha’u husu ba estudante sira presiza hatoman-an ho kultura lee, presiza aprende barak no lee livru barak tamba livru mak janela hodi ita fihir ba mundu. Husi livru mak ita bele hale’u mundu no pelumenus loron ida tenke lee durante oras 1 to’o 3 ka liu”, Ministra Élia hateten iha selebrasaun loron mundiál lee libru iha EBF 65, Uma Tolu, ohin.
Governante ne’e subliña, labarik sira ne’ebé di’ak mak labarik sira-ne’ebé gosta aprende no lee. Halo livru sira hotu-hotu hanesan belun di’ak, tanba husi livru sira bele koñese mundu. Lee livru loron-loron maka pasu ki’ik ida ba futuru ne’ebé nabilan liu.
“Husi lee, ita-boot bele sai buat hotu ne’ebé ita-boot hakarak esploradór espasiál, sientista brillante, ka mezmu super-eroi! Entaun, mai ita loke livru ida, buka istória emosionante balu, no aprende buat foun sira”, Élia realsa.
Nia hanoin, livru sira maka janela ba mundu bainhira lee barak liután, bele hatene mundu ne’ebé luan liután. Tenki badinas lee, no keta haluha fahe istória favoritu sira ba belun sira.
“Tanba provas espontanea ne’ebé hala’o husi MS ba estudantes sira, maiória lee di’ak tebes, husi klase hotu-hotu. Maske nune’e presiza aumenta lee barak liután no pratika loron-loron iha eskola no iha uma”, nia hato’o.
Nune’e nia husu, agradese ba profesór sira tanba sira-nia pasiénsia no dedikasaun, enkoraja no haforsa duni labarik sira bele lee lian rua ho di’ak hanesan lian tetun no portugés.
Iha fatin hanesan, Koordenadór EBF 65 Uma Tolu, Jerimias Soares, haktuir kona-ba livre Ministériu Edukasaun apoia ona livru kaixa lima ba eskola EBF 65 Uma Tolu hodi estudante sira uza lee.
“Foin lalis ami simu ona livru hamutuk kaixa lima, maibé totál livru mak ha’u seidauk sura númeru lolos. Maibé, ha’u sente livru sufisénte ona ba ami-nia estudante. Livru ne’ebé distribui ba ami kompostu husi Matematika, antropolojia, istória no livru sira seluk. Depois ba livru sira-ne’e, ami sei la fahe ba estudante sira, tempu tama aula mak estudante sira ba foti hodi estuda iha eskola”, nia aprezenta.
Eskola EBF 65 Uma Tolu ho totál estudante hamutuk na’in-443 kompostu husi priméiru anu, segundu anu no terseiru ano no totál profesór hamutuk na’in-17 inklui guarda eskolár.
Entretantu,Diretór Servisu Edukasaun munisípiu Vikeke, Julio Sakadura, haktuir kona-ba selebrasaun loron mundiál lee livru munisípiu Vikeke realiza iha eskola EBF 65 Uma Tolu, Lakluta, EBF Irator Uatulari.
Notísia relevante:https://tatoli.tl/2025/05/09/estudante-sira-sai-kualidade-tenke-haburas-kultura-lee/
“Atividade ba komemorasaun loron mundiál lee livru ne’e, estudante sira lee hodi Governante sira akompaña hanesan Ministra Saúde (MS), inspitór eskolár husi Ministériu Edukasaun (ME), atu sira bele haree direta estudante sira iha eskola uza livru lee klae. Tan ne’e, mak ita-nia governante sira ba direta eskola hodi haree rasik”, nia akresenta.
Kona-ba livru ba eskola sira, nia dehan, durante ME distribui direta ona ba eskola sira iha munisípiu Vikeke hodi estudante sira uza aprende lee iha eskola.
Jornalista: Vitorino Lopes da Costa.
Editór : Florencio Miranda Ximenes
