KOVALIMA, 13 Maiu 2025 (TATOLI) – Reprezentante Komandante Jerál PNTL, Superintendente Xefe, Inspetór Jorge Monteiro, fó orientasaun pontu lima ba komandante munisípiu sira liuliu Kovalima atu implementa ba membru sira iha prestasaun servisu lorloron.
“Ha’u hakarak hato’o ha’u-nia orientasaun ba komandante sira iha Komandu PNTL munisípiu Kovalima hodi kuidadu nia membru sira iha ita-boot sira-nia komandu munisípiu ho responsabilidade hanesan komandante, haruka lorloron hodi bele motiva, enkoraja iha sira-nia servisu lorloron ba interrese Estadu no sidadaun nian”, Superintendente Xefe, Inspetór Jorge Monteiro, fó sai orientasaun ne’e liuhusi nia diskursu, iha seremónia inpozisaun diviza, ohin.
Reprezentante Komandu Jerál PNTL nia orientasaun ba daruak mak hanesan, komandante PNTL Munisípiu Kovalima ho estruturua tomak iha munisípiu eskuadra postu hitu hodi mantein nafatin unidade, amizade, mantein espiritu korpu forti no sólidu; servi no proteje sidadaun hotu espesiál iha Kovalima ho profisionalidade, neutralidade ba interrese dezenvolvimentu instituisaun PNTL.
Pontu ba datoluk mak Komandante PNTL Kovalima iha nível komandu munisípiu to’o eskuadra polísia, trata no hadomi membru hodi fó apresiasaun no rekoñese membru nia servisu ho dignu.
Pontu ba da-haat, iha komandu munisípiu, kuida no asegura garante irarkia komandu nian hodi kontrolu mantein nafatin, respeita, kumpri no hadomi komandante munisípiu ho estrutura tomak.
Orientasaun ba pontu ba da-lima mak respeita no kuida postu foun, diviza foun tula hodi motiva servisu di’ak liu, atu asegura no garante dezenvolvimentu karreira servisu profesionál interrese Estadu no sidadaun nian.
“Ha’u rona no momoos imi balun nia hanoin no halo komentáriu ne’ebé di’ak responde katak ho esperiénsia mínimu, kapasidade limitadu ho abilidade mukit ami iha no frakeza umana oioin”, nia fó hanoin.
Iha sorin seluk, Reprezentante Komandante PNTL Munisípiu Kovalima, Superintendente Asistente Joaquim da Costa, dehan ho seremónia promosaun diviza tenke servisu ho responsabilidade.
“Ita-nia responsabilidade iha kna’ar no misaun polísia nian hodi bele atende nesesidade públiku ba komunidade tomak espesiál iha Kovalima. Ita hotu nafatin hatudu prestasaun servisu iha área hotu. Ho diviza foun, motiva ita atu hala’o ita-nia knaar tomak ho espiritu nakonu ho responsabilidade; servi no proteje ita–nia povu sempre presiza ita-nia atendementu ba sira, haree ba kestaun seguransa”, nia reforsa.
Ho nune’e, hodi komandu PNTL munisípiu Kovalima nia naran husu nafatin membru hotu ne’ebé promove ona diviza konsidera hakat ona husi pasu ida pasu ida-ne’ebé aas liu signifika diviza boot, atu hala’o servisu ho disiplina, pontualidade, kreativa, iha inisiativa hodi nune’e bele prodús rezultadu servisu ho efisiente no efetivu .
Seremónia inpozisaun diviza ba PNTL Munisípiu Kovalima, diviza husi inspetór xefe ba postu superintendente asistente. Postu husi inspetór promove ba inspetór xefe, inspetór asistente promove ba inspetór, sarjentu no ajente xefe promove ba inspetór asistente.
Husi sarjentu primeiru ba ajente xefe no ajente prinsipál promove ba sarjentu xefe, ajente xefe promove ba primeiru sarjente, husi ajente prinsipál promove ba ajente xefe no husi ajente promove ba ajente prinsipál.
Jornalista:Celestina Teles
Editór: Rafael Ximenes de A. Belo
