DILI, 14 Maiu 2025 (TATOLI) – Parlamentu Nasionál (PN), liuhusi eleisaun sekreta iha plenária estaordinária, kuarta ne’e, hili Silvério Pinto Baptista (membru efetivu), no Leonito Ribeiro (suplente) hodi reprezenta Parlamentu hanesan membru Konsellu Superiór Majistratura Judisiál ba restu mandatu.
Kandidatu Silvério Pinto aprezenta husi bankada CNRT no Leonito Ribeiro husi bankada PD ne’ebé mai ho pakote úniku.
Deputadu sira ezerse direitu votu liuhusi eleisaun sekreta ho rezultadu votu a favór 42, kontra no abstensaun laiha, enkuantu deputadu husi bankada opozisaun FRETILIN no PLP la marka prezensa.
“Pur unanimidade ita hili ita-nia kandidatu”, Prezidente Parlamentu Nasionál (PPN), Maria Fernanda Lay, fó sai iha sala plenária, ohin.
Parlamentu halo eleisaun ba membru foun ne’e, tanba membru konsellu na’in-rua Carmelita Caetano Moniz (efetivu) no Ivo Jorge Valente (suplente) ne’ebé antes ne’e reprezenta órgaun soberania daruak hahú iha tinan 2022 rezigna-an husi sira-nia knaar.
“Ami halo eleisaun ne’e para kompleta mandatu, tanba ami halo tiha lei hodi hateten katak, reprezentasaun Parlamentu nian iha instituisaun to’o Janeiru 2026. Ami tenke halo fali eleisaun foun ba membru foun hodi mandatu tinan haat bele kompleta”, akresenta.
Prezidente ne’e salienta katak kandidatu na’in-rua la’ós ema foun, sira jurista ne’ebé prienxe kritéria.
Tuir karta aseitasaun husi kandidatu nia parte aseita ho nomeasaun ne’e.
“Ha’u sei uza ha’u-nia méritu no esperiénsia nu’udar jurista ne’ebé serbisu iha setór justisa hahú husi tinan 1998 to’o ohin loron, no sei serbisu hamutuk ho membru konsellu sira seluk ho profisionál, imparsiál, indepedente no neutru tuir lei haruka”, refere karta aseitasaun husi kandidatu Silvério Pinto.
Kona-ba Silvério Pinto
Silvério Pinto ninia edukasaun formál lisensiatura direitu iha Universidade Indonézia no mestradu iha direitu iha Universidade da Paz.
Husi 1996 to’o 2025 sai hanesan asesór jurídiku iha Ministériu Interiór, komisáriu nasionál na rekrutamentu prokuradór, asesór jurídiku iha Ministériu Asuntu Kombatente Libertasaun Nasionál, asesór jurídiku no xefe gabinete Prezidente RAEOA, sai konsultór independente hodi fornese no apoia no akonsellamentu organizasaun naun-governamentál, organizasaun feto inklui Rede Feto Timor-Leste no organizasaun ema ho defisiénsia (ADTL) iha Timor-Leste kona-ba direitu umanu, kestaun igualidade jéneru no planeamentu orsamentu inkluzivu ba dezenvolvimentu direitu ba ema ho defisiénsia.
Aleinde ne’e, asume mós knaar Provedór Direitu Umanu no Justisa (PDHJ, siglá portugés), reeleitu hanesan adjuntu PDHJ ba daruak, sai vise-diretór ba asosiasaun HAK, sai mós hanesan advogadu direitu umanu iha asosiasaun HAK no mediadór ba disputa rai iha Uatulari, munisípiu Vikeke, no munisípiu seluk ba fornesimentu direitu legál no direitu umanu ba PNTL no líder komunitáriu.
Sai mós membru komisáriu nasionál antigu kombatente no veteranu FALINTIL, sai dosente iha UNTL iha fakuldade sira iha Siénsia Polítika no Direitu, sai mós asistente advogadu iha eskritóriu jurídiku Prof. Dr. Erman Radjagukguk iha Jakarta-Indonézia.
Nia mós hetan treinamentu no partisia iha konferénsia oioin iha rai-li’ur no sai oradór. Sai mós Prezidente Konsellu Organizasaun ALFELA (Asosiasaun Jurídiku ba Labarik no Feto), PRADET, FOKUPERS no seluk tan. Aleinde ne’e, hakerek mós artigu oioin hodi públika.
Ba suplente Leonito Ribeiro, hasai kursu doutoramentu iha área siénsia direitu, programa estudu direitu konstituisionál no administrativu iha universidade Udayana Bali (2016-2022), mestradu iha área siénsia direitu, programa estudu direitu konstituisionál no administrativu (2007-2009) iha universidade Udayana Bali no lisensiatura direitu administrativu (1992-1997) iha universidade Katólika Widya Karya Malang, Indonézia.
Notísia relevante: Carmelita Moniz rezigna-an husi membru Konsellu Superiór Majistratura Judisiál
Jornalista: Nelson de Sousa
Editora: Maria Auxiliadora
