OEKUSI, 15 Maiu 2025 (TATOLI) – Komisaun Anti Korupsaun (CAC, sigla portugés), sei tau matan ba implementasaun projetu sira-ne’ebé aprova husi Konsellu Administrasaun Fundu Infraestrutura (KAFI) rejionál iha Rejiaun Administrativa Espesiál Oekusi Ambeno (RAEOA).
“Ami mós hasoru ona Obra Públika, dadús projetu tuan sira ami hetan ona iha 100-resin, depois projetu besik 40 implementa husi KAFI rejionál, husi faze dahuluk to’o datoluk, maibé projetu balun seidauk hetan nia dadús detallu, ne’ebé ami sei ba fali Dili, depois ami-nia enjineiru sira, sei tuun mai atu hamutuk ho sira iha Oekusi, oinsa tulun malu atu ami bele hetan dadus sira-ne’e, atu kontrola tau matan ba projetu sira-ne’e,” Komisáriu CAC, Rui dos Santos Pereira, dehan iha otél Ambeno.
Notísia relevante:KAFI Oekusi aprova projetu emerjénsia 26 ho kustu millaun $36-resin
Nia informa, razaun ne’ebé CAC kontrola projetu sira, tanba iha lei númeru 7/2020 kona-ba Medida Prevensaun Kombate Korupsaun (MPCC), envolve setór privadu sira, entaun bainhira ezekuta projetu sira laiha kualidade, abandona projetu entaun sei tama ba prosesu kriminál.
“Lista balun ami simu ona, ba sira-ne’ebé abandona, maibé presiza ita haree, ami halo akompañamentu, nune’e ita-nia emprezáriu sira-ne’e, jere projetu sira ho didi’ak, labele kaer projetu no halo la kualidade depois uza osan Estadu sai riku de’it tan de’it manán projetu, depois abandona fali,” nia hateten.
Notísia relevante:DRI no ADN fiskaliza uluk projetu 183 molok halo pagamentu
Tuir dokumentu ne’ebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) komposta husi projetu lima kona-ba reabilitasaun estrada rurál, ponte rua no gabiun ida no KAFI datoluk mak ezekuta projetu 27 iha tinan ne’e ho valór orsamentu millaun $36,928,720.47.
Notísia relevante:CAC halo introdusaun lei MPCC ba kargu xefia-setór privadu sira iha Oekusi
Jornalista: Abílio Elo Nini
Editór: Florencio Miranda Ximenes
