DILI, 19 maiu 2025 (TATOLI) – Jivania Jerónimo Amado da Cruz, tinan-16, mak figura selesiona ba ekipa korpu Isar bandeira no sai porta-bandeira (pembawa bendera) nasionál RDTL ba komemorasaun loron restaurasaun independénsia nasionál da-23 iha Palásiu prezidensiál, Bairru-Pité, Dili, tinan ne’e.
Jivania – naran bolu no estimadu, isin-morena, gosta simples no hamnasa no halo belun ho ema seluk, nu’udar nia prinsípiu moris no karakterístika emosionál. Gosta ko’alia maibé mós dalaruma moe – iha ambiente foun ho ema foun. Maske nune’e, feto isin-lotuk altura ne’e iha nia vertude ida – fasil halo adaptasaun.
Ho otas minoridade maibé iha paisaun ba natureza. Nia gosta halo aventura – sa’e foho. Razaun, Jivania gosta besik ho natureza tan sente furak no hakmatek. Dalabarak ladun gosta partisipa iha atividade no grupu sira – prefere mesak, tanba, tuir Jivania, inspirasaun ne’ebé nia hetan husi buat ne’ebé nia gosta.
Partisipa iha grupu CINB iha tinan-2025 ne’e, nu’udar esperiénsia primeira ida ba Jivania. Ba TATOLI, nia haktuir, iha CIBN nia komesa hetan esperiénsia hanesan aumenta mentalidade, iha belun barak no aumenta mós koñesimentu. Ho nune’e, ba oin, nia garante sei ativa no dinámiku liután partisipa iha grupu sira atu empodera nia aan di’ak liután.
Iha nia jornada moris, hanesan labarik, hasoru mós dezafiu, tantu iha uma no mós eskola. Dezafiu sira ne’e dalabarak nia hili ‘nonok’ – lakohi ko’alia sai ba família ka kolega sira. Introvertida. Maibé, tuir Jivania orasaun mak nia solusaun. Orasaun sira sempre hasa’e ba São Miguel Arkanju – nia mahein no protetór.
Nia fiar katak bainira nia hasa’e orasaun nia sente fuan no hanoin hakmatek, ba TATOLI nia konfirma. Oras ne’e daudaun, Jivania hamutuk ho inan-aman no maun-alin na’in tolu hela iha iha bairru Perumnas, suku Bairru-Pité, Postu administrativu Dom-Aleixo munisípiu Dili.
Koñese portadór-bandeira
Naran kumpletu: Jivania Jerónimo Amado da Cruz
Loron no data moris: 24 fulan-Juñu 2009
Idade: 16 anos
Inan-aman: Celestina Jerónimo de Jesus (Doméstika) no Mario Lobo (Pesoál Bombeiros)
Desendente: Inan (Manufahi) no Aman (Ermera)
Estudu:
- Ensinu báziku iha Amigo de Jesus (2020);
- Ensinu báziku terseiru siklu iha Amigo de Jesus (2020);
- Ensinu sekundáriu iha Amigo de Jesus (2024) no agora tuur iha kadeira 120 ano;
Jornalista: Alexandra da Costa
Editór: Rafael Ximenes de A. Belo
