KOVALIMA, 22 Maiu 2025 (TATOLI) – Reprezentante povu iha Uma Fukun Parlamentu Nasionál (PN) liuhusi Komisaun B ne’ebé trata asuntu Negósiu Estranjeiru no Defeza ho Seguransa preokupa ho kazu ema deskoñesidu tuda sidadaun sira, iha auto-estrada, iha área Galitas, suku Tashilin, Postu administrativu Zumalai, munisípiu Kovalima.
“Hanesan reprezentante povu, ami preokupa tanba situasaun auto-estrada la’ós situasaun ne’ebé ita labele meremehkan (menospreza)”, Domingos Augosto Deker, dehan ba jornalista sira, hafoin enkontru iha Komandu PNTL Kovalima, Santa Rosa, ohin.
Komisaun B PN, preokupa ho situasaun referida tanba konsidera problema ne’e la’ós problema baibain maibé problema ne’ebé mak organizadu – presiza atu identifika huun husi problema referidu.
Ho nune’e, reprezenta povu iha PN ne’e rekomenda ba PNTL munisípiu Kovalima ho nia eskuadra, servisu ho responsabilidade atu identifika huun husi problema ne’ebé akontese iha auto-estrada hodi tuda sidadaun sira ne’ebé hala’o movimentu.
“Ami reprezenta povu, ami akompaña problema kuaze tinan barak ona, nunka hotu maibé sempre akontese hela de’it. Ha’u rekomenda ba komandu PNTL no eskuadra sira no mós servisu ho másimu no responsabilidade buka atu identika huun husi problema”, nia dehan.
Iha sorin seluk, Reprezentante Komandante PNTL Munisípiu Kovalima, Superintendente Asistente Polísia, Joaquim da Costa rekoñese, iha loron hirak ba kotuk akontese iha auto-estrada área Galitas, iha suku Tashilin, postu Zumalai.
“Ha’u hato’o ona ba prezidente komisaun B PN kona-ba asaun polísia iha komandu munisípiu Kovalima bainhira rona no akompaña informasaun ne’ebé virál iha mídia hafoin akontesimentu vítima la hato’o keixa iha komandu no eskuadra”, nia haktuir.
Vítima sira ba direta ba ospitál , hafoin fó sai infomasaun liuhusi mídia sosiál nune’e komandu PNTL hetan orientasaun husi komandu jerál PNTL ezekuta orden haruka ekipa patrullamentu seksaun rezerva intervensaun rápida iha komandu hamutuk eskuadra hodi halo konfirmasaun no halo aprosimasaun ba líder komunitária apoiu, bele hatene tuir.
Notísia relevante:Ema deskoñesidu tuda sidadaun sira iha auto-estrada Zumalai-Kovalima
Jornalista:Celestina Teles
Editór: Rafael Ximenes de A. Belo
