DILI, 31 Maiu 2025 (TATOLI)—Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, informa STAE hahú prepara atividade importante tolu iha tinan oin.
“Tinan oin STAE iha atividade tolu ne’ebé importante. Ida, mak atividade rutina para sustenta ezisténsia instituisaun ida-ne’e. Ida fali resensiamentu nível postu no rai li’ur no ikus preparativu ba eleisaun prezidensiál,” Diretór Jerál STAE, informa bá Tatoli, iha nia knaar fatin, Kaikoli, sábadu ne’e.
Responsável ne’e dehan asuntu ne’e STAE planeia ona maibé depende bá iha diskusaun iha Orsamentu Jerál Estadu 2026 nian. “Ativadade tolu ami presiza halo, maibé ida-ne’e presiza orsamentu kuaze rihun $700-resin. Ne’e proposta ne’ebé ami propoin hakarak halo,” nia hatutan.
Elviro Fernandes hateten agora STAE identifika nesesidade saida mak presiza haree, enkuadramentu legál ni’an, karik altera buat ruma, liuliu altera Lei Eleisaun Prezidensiál nian karik iha parte ne’ebé no karik altera ida-ne’e implementasaun ba nia prosesu regra ka nia matadalan no regulamentu oinsá.
“Ida-ne’e mak ita prepara. Buat seluk ne’e identifikasaun ba nesesidade. Ezemplu, agora ami identifika hela potensiál sentru votasaun ne’ebé ita hakarak aumenta iha 2026 no lojístika no saida mak ita presiza halo akizisaun iha tinan 2026 tanba ita hatene normalmente eleisaun rezidensiál iha fulan-Marsu,” nia tenik.
Nia hatutan dalaruma prosesu aprovizionamentu ne’e, entre fulan-Janeiru to’o Marsu, barak demais entaun buat balun presiza propoin ona, no halo ona akizisaun.
“Prosesu aprovizionamentu ita halo ona iha tinan 2026. Buat sira ne’e ami identifika hodi koloka iha ami-nia preparativu sira ba iha orsamentu 2026 nian,” Elviro esklarese.
Aleinde ne’e, STAE mós planu estabelese ekipamentu permanente iha postu sira iha rai-laran no rai-li’ur.
“Atu estabelese parmanente iha munisípiu ne’e, sei iha tinan oin tuir planu ne’ebé iha. Maibé, ida-ne’e depende ba orsamentu ne’ebé ita propoin. Karik hetan ona aprova atu estabelese ekipamentu iha postu ne’e, sei akontese ba tinan oin,” nia subliña.
Diretór Jerál STAE, Elviro Fernandes salienta katak planu estabelese postu atendimentu kuaze 80, kompostu hosi rai-laran 70 no restante ba rai-li’ur.
“Iha rai-laran pelumenus estabelese postu atendimentu hamutuk 70, tanba ita iha postu administrativu 69, entaun pelumenus iha postu atendimentu postu iha rai-laran 70, no mós iha rai-li’ur purvolta 7. Iha Austrália ne’e presiza fatin rua ka tolu, ida iha Portugál, Reinu Unidu no Koreia Súl.
STAE planeia halo atendimentu móvel
Iha biban ne’e, Diretór Jerál STAE ne’e informa katak STAE planeia halo atendimentu móvel bá postu sira iha territóriu.
“Iha tinan ida-ne’e ita laiha atividade permanénsia, atividade atualizasaun ka resensiamentu permanénsia iha postu sira. Tuir ami-nia planu, haree ba ita-nia kondisaun rekursu ne’ebé iha, osamentu no lojístika, ami estabelese de’it ekipa móvel ne’ebé hahú iha fulan-Jullu ne’e bá kada postu hodi halo atendimentu,” nia haktuir.
Nia dehan pelumenus postu ida sira bele to’o loron-sanulu (10), hodi atualiza kartaun eleitorál biométriku no atividade atendimentu móvel sei terminadu iha Dezembru 2025.
Nune’e, preparasaun ne’ebé ekipa STAE sira hahú halo identifikasaun ba liña internét, ida-ne’e importante tanbá atu halo atendimentu móvel ne’e tenke iha liña internét ne’ebé di’ak.
“Hahú identifika asesu liña internét iha kada postu administrative. Iha fulan-Juñu hahú instala ekipamentu biométriku, identifika nesesidade operasionál sira seluk hanesan transporte, alojamentu ba tékniku sira no rekursu umanu,” Elviro haklaken.
Nia subliña katak parte nasionál fó de’it asisténsia téknika no monitoriza prosesu atendimentu iha postu administrativu sira. STAE munisípiu mós sei halo sensibilizasaun kona-ba proseseu atualizasaun kartaun eleitorál ne’e ba iha autoridade postu administrativu no suku sira molok bá halo atendimentu.
Jornalista: Osória Marques
Editór: Xisto Freitas da Piedade
