DILI, 11 Juñu 2025 (TATOLI)–Prezidente Parlamentu Nasionál (PPN), Maria Fernanda Lay, relata rezultadu hasoru malu ho Papa Leão XIV iha Vatikanu ba Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili.
Notísia Relevante: PPN komprimenta Amu Papa Leão husu bensaun ba povu Timor-Leste
“Ha’u mai relata ba ita-nia Prezidente Repúblika tanba momemntu ha’u ba Roma hasoru no komprimenta ita-nia Sua Santidade Papa Leão hodi reprezenta ita-nia Xefe Estadu, entaun ha’u mai informa fali ba ita-nia Prezidente,” Prezidente PN, Maria Fernanda Lay, hateten ba jornalista sira hafoin remata reuniaun ho Xefe Estadu, José Ramos Horta, kuarta ne’e.
Nia reprezenta Estadu Timor-Leste partisipa misa inaugurasaun pontifikadu ba Papa Leão XIV, iha Basilika São Pedro, Roma–Vatikanu, iha loron 18 Maiu 2025.
“Pela primeiravés, ha’u bá Roma, ida-ne’e mak ha’u kontente no lori Timor-Leste ninia reprezentatividade no ha’u husu ba Amu Papa, iha momentu ha’u komprimenta no husu ninia bensaun ba ita Timor laran tomak ka povu Timor-Leste,” nia dehan.
PPN partisipa iha serimónia ne’e ho delegasaun hamutuk 200-resin ne’ebé hanesan reprezentante nível altu husi nasaun lubun iha mundu.
“Ha’u bá reprezenta Prezidente Repúblika, klaru katak viajen dook maibé ha’u hanoin, ha’u akompaña mós balun iha facebook, sira hateten dehan ha’u la rein Amu Papa nia liman ne’e, la loos. Tanba, iha ne’ebá virus konstipasaun no mear, ne’ebé Amu Papa mós dada ninia liman, la’ós hotu-hotu só ida ka rua de’it mak rein Amu Papa nia liman,” nia hateten.
Nia hatutan, maneira komprimenta la’ós rein nia liman maibé nia halo veña ba Santu Padre, klaru katak mia orgulu tebes iha oportunidade ba hetan ho Sua Santidade Papa Leão.
Nia haktuir, komprimenta labele lori tempu naruk tanba iha delegasaun 200-resin mak komprimenta.
“Ha’ u hato’o ba nia (Amu Papa Leão) katak kongratulasaun ba nia simu pose no ha’u hateten ha’u mai reprezenta Prezidente Republika no husu bensaun ba populsaun Timor Leste tomak,” Maria Fernanda Lay dehan.
Jornalista : Hortencios Sanchez
Editór : Cancio Ximenes
