BOBONARU, 10 Juñu 2025 (TATOLI)—Ekipa tékniku Eletrisidade Timor-Leste, Empreza Públika (RDTL, E.P) Bobonaru, tersa ne’e, deside halakan hikas ahi ba komunidade iha aldeia Nunutanan, suku Raifun, aldeia Maganutu, suku Ritabou, postu administrativu Maliana no suku Raiheu, Atudara, Genulai, postu administrativu Kailaku, hafoin dezliga enerjía elétrika kuaze loron haat nia laran.
Notísia Relevante: EDTL Bobonaru ameasa hakotu liña eletrisidade iha Raiheu-Genulai-Goulo-Atudara
Supervizór EDTL, E.P Bobonaru, Mário de Jesus, konfirma EDTL dezliga ahi ba aldeia no suku hirak ne’e tanba durante fulan neen liu ona uza ahi ho gratuita no barak liu mak seidauk rejista ka selu taxa $36 atu sai kliente legalmente.
Ekipa tékniku EDTL, E.P halakan fali ahi tanba durante loron haat nia laran komunidade barak mak halerik no preokupa.
“Ha’u simu orientasaun husi ami-nia ezekutivu sira katak ida-ne’e ita hanesan mós hafanu ita-nia komunidade atu nune’e sira bele tau atensaun, koopera no kumpre regra EDTL nian. Agora dadauk ahi ne’e lakan ona to’o Manu-Nihan moris de’it, ami-nia t’ekniku prontu atende 28 oras nia laran, bainhira iha fallansu no avaria ruma,” Nia informa ba jornalista sira, iha nia kna’ar fatin, kuarta ne’e.
Mário de Jesus afirma, iha fulan ne’e nia laran ekipa tékniku EDTL, E.P munisípiu Bobonaru sei tun ba terrenu atu monta kontadór ba kada uma kain.
“Iha ne’ebá dehan katak ida-ne’ebé selu ona $36 ne’e kada uma kain hodi rejista, osan sira-ne’e tama hotu ona iha banku tanba sira selu ona. Agora, sira ida seidauk selu ka rejistu ne’e, aban bainrua kontadór avaria ruma karik mak sira selu $36 tiha lai mak foin mak ita ba hadi’a. Ha’u-nia mensajen ba komunidade, ami monta tiha prepagu, ikus mai labele halo ligasaun ilegál. Se ida-ne’e mak akontese, EDTL, E.P sei foti desizaun tuir lei númeru 33, 2016 artigu 13 hodi aplika multa tuir ninia kategoria ne’ebé iha,” nia hateten.
Enkuantu, tuir dadusa ne’ebé Tatoli asesu mak kliente iha suku no aldeia hirak ne’e hamutuk 1,000-resin.
Notísia Relevante: EDTL Bobonaru deside kansela hakotu liña eletrisidade ba suku Saburai-aldeia Atus
Jornalista : Sergio da Cruz
Editór : Cancio Ximenes
