DILI, 18 Juñu 2025 (TATOLI)-Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, informa posibilidade Governu liuhosi MAKLN halo pagamentu ba lista kombatente ne’ebé laiha reklamasaun no kontestasaun iha tinan-ne’e.
“Tinan ne’e ita halo pagamentu, maibé la signifika halo boron de’it. Sira ne’ebé loos laiha lista reklamasaun no kontestasaun, nia prosesu la’o”, Oan-Soru hatete iha Palásiu Governu hafoin enkontru Konsellu Ministru, kuarta ne’e.
Oan Soru hatutan ida-ne’ebé sala, prosesu kontinua. Veteranu ne’ebé laiha reklamasaun mak sei hetan pagamentu uluk. Kuandu iha reklamasaun no kontestasaun sei re-verifika.
Nia dehan lista reklamasaun agora rihun 61 mak prosese hela, tanba tuir lei ne’e presiza fulan tolu, signifika ramata iha Juñu nia rohan. Nune’e, hein de’it tanba lista reklamasaun no kontestante ne’e barak liu.
Totál hamutuk 124.782, ida-ne’e iha segundu rejistu 2009 nian, ne’ebé válida mak 10.249.
Liuhosi konteúdu ne’ebé mensiona iha estatutu kombatente libertasaun nasionál, lei númeru 3/2006, no artigu 13 hateten rejistu kualidade hanesan kombatente libertasaun nasionál sei kontinua hala’o validasaun rejistu ba períodu daruak nian ba rekoñesimentu kombatente hanesan libertasaun nasionál ne’ebé rejista iha tinan 2009.
Notísia relevante: MAKLN kontinua prosesa lista reklamasaun no kontestasaun
Jornalista : Osória Marques
Editora : Rita Almeida
