VIKEKE, 21 Juñu 2025 (TATOLI)–Diretór Sekretariadu Tékniku Administrasaun Eleitorál (STAE) Munisípiu Vikeke, Humberto Fernandes, informa STAE rejista eleitór husi Munisípiu Vikeke hamutuk 6.930 trata ona kartaun biométriku.
“Durante ne’e, ami rejista eleitór husi Munisípiu Vikeke hamutuk 6.930 muda sira-nia kartaun eleitorál ba biométriku. Husi númeru ne’e eleitór foun feto 344 no mane hamutuk 668, atualiza feto 2.525 no mane 3209,” Humberto Fernandes ba TATOLI, iha ninia knaar fatin, sábadu ne’e.
Humberto profunda, iha fulan Marsu to’o Maiu, tinan ne’e, STAE Vikeke laiha blanku (kartaun), maibé ekipa téknika sira kontinua fó atendimentu ba eleitór sira.
“Maski iha fulan tolu ita laiha blanku, ita kontinua halo atendimentu ba ita-nia eletór sira hamutuk 2.295. Maibé, ita la halo emprime sira-nia kartaun,” nia haktuir.
Tan ne’e, Humberto dehan, agora daudaun tékniku STAE Vikeke halo hela imprensaun ba eleitór 2.295, depois emprimi hotu distribui ba eleitór sira.
“Prosesu emprimi ramata ami sei komunika autoridade suku no sei fó-sai mídia sosiál atu ita-nia eleitór sira bele mai foti sira-nia kartaun eleitóral,” Humberto tenik.
Nia akresenta, atendimentu ba kartaun biométriku iha STAE Vikeke, ekipa téknika atende komunidade kada loron, depende ba komunidade ne’ebé mai trata sira-nia kartaun tantu foun no atualiza kartaun.
Entretantu, funsionáriu serbisu iha STAE Munisípiu Vikeke hamutuk na’in-ualu (8) ne’ebé fó-atendimentu kada loron ba eleitór sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
