DILI, 23 Juñu 2025 (TATOLI)—Diretór Servisu Saúde Munisípiu Ermera (SSME), Domingos de Deus, hateten durante Abríl to’o Juñu, tinan ne’e, SSME rejista asu tata abitante hamutuk 62 no na’in-ida lakon vida.
“Asu tata primeiru ne’e iha 01 Abríl lori to’o ospitál pasiente ne’e hakotu-iis. Totál kazu ne’ebé mak ami rejistu iha na’in-62,” Domingos de Deus hateten ba TATOLI via telefónema, segunda ne’e.
Nia dehan asu sira-ne’ebé mak tata abitante ne’e, iha ida mak pozitivu rabies, más seluk la hatudu sintoma.
Nia esplika, abitante ne’ebé hetan tata husi asu ne’e daudaun ne’e hala’o hela tratamentu, ne’ebé seidauk hatene bainhira mak halo rekuperasaun tanba sira simu tratamentu ne’e durante fulan tolu.
Tanba ne’e, Domingos hatutan, Servisu Saúde Munisípiu Ermera Servisu ho Autoridade Munisípiu Ermera halo intervensaun hodi fahe informasaun no promosaun ba komunidade kona-ba prevensaun vírus referidu.
Nia informa katak ai-moruk anti rabies (raiva) ne’e sufisiente atubele fó tratamentu ba abitante ne’ebé mak hetan ona tata husi asu.
Notísia relevante: Koñese moras rabies hodi salva ita, animál no Timor-Leste
Iha parte seluk, Diretór Nasionál husi INSPTL, Nevio Sarmento, rekoñese katak iha informasaun asu tata tan abitante iha Postu Administrativu Railaku, Munisípiu Ermera, tanba ne’e komunidade simu ona vasina.
“Iha ema na’in-tolu mak asu tata iha Railaku. Ida-ne’e hato’o ona mai ami katak sira simu ona vasina. Iha Postu Gleno mós asu tata ema na’in-haat. Sira mós simu ona vasina, maibé kazu ne’e aumenta nafatin,” Nevio Sarmento haktuir.
Nia dehan, Ministériu Saúde kontinua apela ba komunidade katak bainhira asu tata tenke bá kedas fasilidade saúde ne’ebé mak besik atu hetan tratamentu.
Entretantu, tuir dadus husi Ministériu Saúde liuhusi Institutu Nasionál Saúde Públika Timor-Leste hamutuk ho Diresaun Nasionál Veterinária Ministériu Agrikultura Pekuária, fó-sai katak hahú husi tinan 2024 sistema vizilánsia saúde nasionál rejistu ona asu hamutuk 1.445. Husi númeru ne’e, asu hamutuk 96 pozitivu raiva.
Jornalista: Felicidade Ximenes
Editór: Xisto Freitas da Piedade
