DILI, 25 Juñu 2025 (TATOLI)—Konservasaun Internasionál Timor-Leste (CITL-sigla portugeza) sei proteje fatin turizmu tasi nian iha munisípiu rua hanesan Likisá no Lautein.
Diretór Ezekutivu CITL, Manuel Mendes, hateten sira servisu iha kooperasaun ho Sekretaria Estadu Peska, Ministériu Agrikultura, Pekuária, Peska no Floresta no autoridade lokál sira atu implementa projetu ne’e iha munisípiu referidu.
“Ami mobiliza hela fundu ba Timor-Leste no ami iha ona planu atu estabelese Parke Dugong rua (Karau Tasi) iha Munisípiu Lautein no Parke Baleia iha Munisípiu Likisá,” Manuel Mendes hateten ba jornalista sira iha semináriu nasionál ho tema “Hakbiit Kolaborasaun Parte Interesada sira hodi Hasa’e Eskala ba Konservasaun Marínea ba Konservasaun Azúl Ekonómiku, iha Novo Turismo, Lesidere, Dili, kuarta ne’e.
Nia haktuir katak CITL iha asesu ba fundu globál husi Fundasaun Margareth no Cargills Philatropies of America hamutuk ho Indonézia ho osan maizumenus millaun $1.5 atu dezenvolve Parke Dugong no Baleia iha Timor-Leste.
Tuir diretór ne’e, CITL hahú estudu ne’e no garante katak sei estabelese iha tinan rua oin-mai.
“Ami konsidera konservasaun tasi nian hodi proteje animál tasi nian bele atrai turizmu mai rai-laran. Ita la’ós konserva de’it biodiversidade tasi nian, maibé ita mós prepara no promove turizmu,” nia garante.
Iha fatin hanesan, Sekretáriu Estadu Peska, Domingos dos Santos, hateten katak objetivu hosi projetu ne’e atu fó apoiu ba atividade eko-turizmu, liuliu ba espésie ikónika tasi nian hanesan dugong no baleia.
“Projetu ne’e sei kontribui ba dezenvolvimentu sustentavel no aliña ho prioridade Governu Dasiak Timor-Leste nian ba ekonomia azúl. No bele kontribui hodi proteje hasoru ameasa sira,” Domingos dos Santos informa.
Governante ne’e konsidera estabelesimentu parke ne’e kontribui mós ba moris di’ak espésie tasi nian no kontribui ba promosaun turizmu.
Jornalista: Felicidade Ximenes
Editór: Xisto Freitas da Piedade
