DILI, 28 Juñu 2025 (TATOLI) – Vise-Primeiru-Ministru, Ministru Koordenadór Asuntu Ekonómiku, no Ministru Turizmu no Ambiente, Francisco Kalbuadi Lay, hateten Konferénsia Komunidade Aziátiku Portugés (APCC, sigla inglés) ba dahaat, hala’o papél importante nu’udar ponte kulturál no komunikasaun entre Komunidade Lian Portugésl (CPLP) no País ASEAN.
Nia hato’o liafuan hirak ne’e bainhira halo diskursu iha loron daruak Konferénsia APCC ne’ebé hala’o iha Sentru Konvensaun Dili (CCD), sesta ne’e.
“Konferénsia ne’e la’ós de’it hanesan momentu ida reflesaun istóriku nian, maibé mós hanesan afirmasaun ida hosi identidade ne’ebadubé liga ita nia nasaun, povu Ázia nian, no mundu luzófonu nian”, Kalbuadi Lay hateten iha nia diskursu ohin.
Nia subliña katak, APCC hanesan meiu importante ida atu harii relasaun entre jerasaun sira ne’ebé sustentável iha prezervasaun no manutensaun patrimóniu kulturál.
“Konferénsia ba dahaat ne’e importante tebes ba ita-nia nasaun nu’udar ponte ba relasaun kulturál no diplomátika entre CPLP ho ASEAN, orgullu Timor-Leste nu’udar membru CPLP no halo parte iha komunidade portugés-aziátika. Ami sente orgullu atu halo parte iha família portugés-aziátiku, ne’ebé reflete ligasaun entre Leste no Oeste”, nia hatutan.
Iha biban ne’e, nia mós konvida partisipante hotu atu halo APCC sai espasu hodi fahe ideia no diálogu ba dezenvolvimentu hamutuk.
“Espera lasu ida ne’e sei metin liu tan no bele sai oportunidade ida atu hadia futuru ba ita-nia jerasaun foun,” nia hateten.
Konferénsia APCC ba dahaat iha Dili ne’e hanesan plataforma importante ida hodi promove kooperasaun kulturál, turizmu relijiozu no kulturál, dezenvolvimentu sustentável, no hametin relasaun ekonómika entre ema sira iha rejiaun Ázia no nasaun sira ne’ebé ko’alia lian portugés.
Jornalista: Arminda Fonseca
Editór: Florencio Miranda Ximenes
