DILI, 30 Juñu 2025 (TATOLI)–Koordenadora Grupu Traballu Reforma Setór Justisa, Lúcia Lobato lamenta ho prosesu rekrutamentu ba juíz konsilleiru ne’ebé túr iha Supremu Tribunál Justisa.
Nia dehan, Komisaun Rekrutamentu ba Juíz Konsilleiru na’in-hitu ne’ebé husi Parlamentu hodi bá túr iha Supremu Tribunál Justisa tuir Lei Organizasaun Judisiária artigu 97 ne’e sei hamosu konflitu interese no konsideradu polítiku liu tanba juíz ne’e karreira no profosionál.
“Siginfika katak se nia la’ós juíz konsilleiru nia labele rekrutadu atu tama bá iha júri ida-ne’ebé atu halo primeiru rekrutamentu bá iha juiz konselleiru sira,” Lúcia Lobato dehan ba jornalista sira iha Semináriu Nasionál ho tema “Dezafiu no prespetiva instalasaun Supremu Tribunál Justisa iha Timor-Leste”, ne’ebé hala’o Tribunál Primeira Instánsia, segunda ne’e.
Nia hatutan, kandidatu sira-ne’ebé atu konkore ba juíz konselleiru ne’e, labele inklina-aan iha komisaun liuliu iha ekipa júri, más sira-ne’ebé hanesan juíz konsilleiru mak bele sai júri nune’e bele halo rekrutamentu ba membru sira seluk.
“Ita hatene membru na’in-lima husi Konsellu, ida nomeado aos seus país, ida seluk Prezidente Tribunál ne’ebé prezide Konsellu Superiór. Klaru iha ka lae membru sira-ne’e interese atu konkore sai konsilleiru, sira rasik bele nomea sira nia-aan sai konselleiru,” nia esplika.
Tuir nia katak iha tempu liubá hafoin diskusaun barak ne’ebé liu, komprende katak iha konflitu interese hodi nomea sira-nia aan rasik sai juíz konsilleiru.
Lúcia haktuir katak iha komisaun ida kompostu husi ema na’in-tolu, ida Prezidente Repúblika mak nomea no na’in-rua Parlamentu Nasionál mak nomea, sira-nia funsaun ne’e atu konstitui júri ida atu halo selesaun, la’ós sira na’in-tolu mak atu nomea.
“Sira júri ne’e nomeadu halo selesaun depois lista selesaun ne’e sei fó ba Konsellu Superiór mak nomea. Konkorda ka la konkorda, sira (Konsellu Superiór) mak sei nomea no sei fó pose tuir buat ne’ebé konstituisaun no lei fó ona,” nia esplika.
Iha fatin hanesan, Membru Konsellu Superiór Majistratura Judisiária husi Parlamentu Nasionál, Silveiro Baptista Pinto, hateten komisaun ne’e tenke kria regulamentu no kritériu ne’ebé rigorozu atu halo rekrutamentu ba júri sira.
“Liga ho rekrutamentu no regulamentu, ha’u rasik mak prepara. Ohin Doutora Lúcia Lobato dehan kritériu tenke rigorozu, sim, rigorozu duni. Kritériu atu halo rekrutamentu ba júri ne’ebé mak atu halo prosesu ba prokuradór ne’e ita tau kritériu rigorozu,” nia hakotu.
Jornalista: Natalino Costa
Editór: Xisto Freitas da Piedade
