DILI, 03 Jullu 2025 (TATOLI)—Hospitál Nasionál Guido Valadares (HNGV) prepara ona pesoál saúde hamutuk na’in-26 hodi halo atendementu ba atleta jogu CPLP ne’ebe sei realiza iha Timor-Leste iha 17-27 Jullu 2025 ne’e.
Notísia Relevante: HNGV Preparadu halo atendimentu saúde iha jogu CPLP
“Iha ne’e ita fahe ona ba ekipa tolu (3) mak hanesan ekipaida iha emerjénsia ne’ebé kompostu husi pesoál saúde husi emerjénsia nian ne’ebé sei atende trauma, komorbilidade no iha baze,” Diretór Kliniku HNGV, Arcanjo Nunes, hateten ba jornalista sira, iha HNGV, ohin.
Nia hateten, atleta sira dalabarak trauma maka’as entaun HNGV prepara ekipa trauma nian hanesan mediku sirurjia, ortopedista inklui mós ho mediku jerál balun ne’ebé mak HNGV prepara ona.
“Iha atleta balun sofre tensaun kurasaun intuksikasaun kona-ba hahan ruma ne’e atendementu ketak no HNGV mós prepara fatin ba VIP sira. Depois pasiente sira ita klasifika katak pasiente ne’e moras grave, moderadu ka kmaan. Se kmaan, ita haruka ba hotu Lahane tanba fatin iha ne’eba mós preparadu inklui rekursu umanu ho ekipamentu médiku,” nia afirma.
Nia haktuir, ekipa iha baze ne’e doutór sira ne’ebé mak akompaña jogu durante loron 10 no estadiun lima (5) ne’ebé mak iha ne’e koloka mós doutór na’in-lima (5) inklui espesialista ortopedia no desportiva nian atu hatene trauma sira, tanba atleta balun hetan agresaun maka’as no koordena ho SNAEM bele atende kedas iha baze.
“Iha mós atleta sira-ne’ebé mak labele ona halo tratamentu iha baze mak lori mai HNGV hetan tratamentu husi ekipa emerjénsia. Iha ne’e mak deside ida-ne’ebe grave baixa hela iha HNGV no ida-ne’ebe moderadui sei lori ba iha Lahane,” nia esplika.
Responsavel ne’e hateten, pesoál saúde sira sei prepara ekipamentu médiku másimu, tanba ekipamentu sira-ne’e la’ós atu halo tratamentu de’it ba atleta sira, maibé ba mós ema-ne’ebé mai haree jogu ne’e rasik banhira sira oin halai ka monu ruma bele atende hotu.
Notísia Relevante: Ministériu Saúde preparadu atende atleta sira iha jogu CPLP
Jornalista : Felicidade Ximenes
Editór : Cancio Ximenes
