DILI, 03 Jullu 2025 (TATOLI) – Deputadu sira husi Komisaun D iha Parlamentu Nasionál (PN) ne’ebé trata Asuntu Ekonomia no Dezenvolvimentu sei realiza vizita ida bá kampu Bayu Undan iha 15 Jullu ne’e.
Prezidente Komisaun D, Ricardo Baptista, hateten objetivu husi vizita ne’e atu haree besik liután atividade sira ne’ebé hala’o iha ne’ebá.
Deputadu ne’e hato’o ona ba Ministru Petróleu no Rekursu Minerál (MPRM), Francisco Monteira, kona-ba sira-nia vizita ne’e, bainhira hasoru malu iha PN, kinta-feira ne’e.
Iha enkontru ne’e, Ministru Petróleu mós informa kona-ba atividade sira ne’ebé la’o iha Bayu Undan. “MPRM ho autoridade tutela sira fó informasaun kona-ba atividade petróleu, liuliu Bayu Undan katak ita laiha ona produsaun no tanba la viavel ona, ba oin sei haree ba gás ne’ebé besik”, nia akresenta.
Ministru atualiza mós katak produsaun Bayu Undan nian ramata ona, signifika reseita mós sei laiha. “Maibé fó nafatin iha setór ida-ne’e iha tinan haat ka lima mai, bainhira dezenvolve nafatin ho diskusaun no intensifika kontaktu ho Santos no parseiru sira Timor Gap ba fasilidade sira iha Bayu Undan, ita bele halo filafali nia sai hanesan sentru prosesamentu iha tasi Timór ba gás sira ne’ebé besik”, hateten.
Relembra katak petrolífera Santos ho parseiru sira informa ona Governu kona-ba produsaun mina no gás iha kampu Bayu Undan ne’ebé termina ona.
Empreza Santos mós propoin hela depoizde produsaun mina no gás hotu, nia parte husu Governu konsidera sira-nia hanoin oinsá uza ekipamentu ne’e ba projetu ida Carbon Capture and Storage (CCS) nian.
Bayu Undan lokaliza iha tasi Timór, besik kilómetru 250 husi parte súl Dili nian. Kampu ne’e hahú produsaun iha tinan 2004.
Empreza australiana Santos mak halo operasaun ba Bayu Undan, ne’ebé kaer partisipasaun 36,5% no mós halo parte iha joint venture SK E&S (21%), INPEX (9,6%), ENI (9,2%), Tokyo Timor Sea Resources (7,7%) no Timor GAP (16%).
Notísia relevante: Empreza Santos informa produsaun mina no gás iha Bayu Undan termina – MPRM
Jornalista: Nelson de Sousa
Editora: Maria Auxiliadora
